Kruse: Piumasarineqartut piviusunngortikkuminaassapput

Inatsisartut aalisarnermut, piniarnermut nunalerinermullu ataatsimiititaliaata siulittaasuata Nikolaj Jeremiassenip Aalisarnermut, Piniarnermut Nunalerinermullu Naalakkersuisoq Karl-Kristian Kruse KNR-radioaviisikkut sakkortuumik ullaaq februaarip 10-anni uparuarpaa qaammatini marlunni naalakkersuisooreeraluarluni  anguniakkaminik maannamut suli saqqummiussinnginnerarlugu.

Nikolaj Jeremiassen ilaatigut oqarpoq Karl-Kristian Kruse qilalukkanut qaqortanut qernertanullu politikkeqannginnerarlugu, Karl Lyberthillu, Aalisarnermut, Piniarnermut Nunalerinermullu Naalakkersuisuusimasoq, tamatumunnga politikkianik ingerlatitseqqiinnartuunerarlugu.

- Qilalukkat qaqortat qernertallu pillugit nunat tamalaallu ukiunut pingasunut atuuttussamik isumaqatigiissuteqarsimagatta, tamatumunnga politikkerput imaaliallaannarlugu allanngortissinnaanngilarput, Aalisarnermut, Piniarnermut Nunalerinermullu Naalakkersuisoq Karl-Kristian Kruse oqarpoq.

Decembarip 31-anni 2012-mi Naalakkersuisuusut ukiunut pingasunut pilersaarut nutaaq, pisassiissutit akuerivaat.

- Naalakkersuisuni ilaasortatut qilalukkanik qaqortanik qernertanillu ukiumi pisassiiffiusumi 2015-imi januaarip aallaqqaataaniit decembarip 31-annut pisassiissutit ukiunut pingasunut pilersaarut naapertorlugu aalajangersarneqareersut maliinnarneqassasut aalajangerpunga.

- Pisassiissutit aalajangerneqartarlutik nunat tamalaat akornanni isumaqatigiissutit, biologit siunnersuinerat, atuisut ilisimasaat aamma Piniarneq Pillugu Siunnersuisoqatigiinnik tusarniaasimaneq tunngavigalugit, Karl-Kristian Kruse erseqqissaavoq.

Raajat

Inatsisartut aalisarnermut, piniarnermut nunalerinermullu ataatsimiititaliaata siulittaasuata ukioq manna raajartassiissutigineqartut ikilerujussuarneri ernumassutigai, isumaqarlunilu ikileriarnerisa ilaqutariippassuit eqqussagai, suliffissat ikileriassaqalutik.

Naalakkersuisut decembarip 30-anni 2014 aalajangerpaat Kitaani 2015-imi raajartassat 73.000 tonsiussasut, tamatumani EU-p 2.000 tonsit Canadamullu 6.100 tonsit ilanngunneqareerlutik.

- Naalakkersuisut aalajangiiniarnerminni Kitaani raajartassat MSC-mik nalunaaqutaqartinnerat immikkut isiginiarsimavaat, Karl-Kristian Kruse oqarpoq.

- Aalisartut uumassusilinnik misissuisut isumaqatigaat Kalaallit Nunaata Kitaani kinguppaqassutikkut pissutsit ilungersunarmata. Ilaatigummi avataani uumasoqatigiaat ukiup ataatsip ingerlaneriinnaani 50 procentinik ikileriarsimapput, tamatumani ukiuni 20-ni annikinnerpaanngorsimallutik, Karl-Kristian Kruse erseqqissaavoq.

 

Attavigineqarsinnaavoq: Jørgen Isak Olsen, pisortaq. Aalisarnermut, Piniarnermut Nunalerinermullu Naalakkersuisoqarfik. E-mail: jio@nanoq.gl