Nersornaasigassamik siunnersuuteqarit

Avatangiisinik Pinngortitamillu Mianerinninneq pillugu Nersornaat 2015

-       Illit illoqarfinni nunaqarfinniluunniit atuarfik nunatsinnik saligaatsuutitsiva?

-       Kikkut nunatsinnik eqqiluitsuutitseqataappat?

                                                                             

Ukioq manna Avatangiisinik Pinngortitamillu Mianerinninneq pillugu nersornaasigassamik siunnersuuteqarit!

Pinngortitamut, Avatangiisinut Inatsisinillu Atuutsitsinermut Naalakkersuisup Mala Høy Kúko-p ukioq manna atuarfiit avatangiisinut pinngortitamullu immikkut iliuuseqarsimasut saqqummertikkusuppai. Taamaattumik atuarfimmi eqqakkat pillugit suliaqartoqarsimappat innersuussinissannut periarfissaqalerputit. 

Inuit, suliffeqarfiit kattuffiilluunniit nunatsinnik saligaatsuutitsisut pillugit innersuussutinittaaq nassiussisoqassasoq Naalakkersuisup kaammattuutigaa.

2004-mi Naalakkersuisut  aalajangiuppaat Avatangiisinut Pinngortitamillu Mianerinninneq pillugu Nersornaasiisoqartassasoq, siullermillu 2007-imi nersornaasiisoqarpoq.

Ukioq manna arfineq pingajussaanneerluni nersornaasiisoqassaaq, kikkulluunniillu nersornaaserusutaminnik siunnersuuteqarsinnaapput, ataani allassimasoq siunertaq naapertuuppat:

Inuit, suliffeqarfiit kattuffiilluunniit tamatsinnik pinngortitamik avatangiisimillu mianerinninnissatsinnik ilisimaarinnilersitsisut imaluunniit Kalaallit Nunaanni suliniuteqarnermikkut avatangiisitsinnik pitsanngorsaataasumik iliuuseqarsimasut nersorniarlugit nersornaasiisoqartarpoq.

 

Pinngortitamut, Avatangiisinut Inatsisinillu Atuutsitsinermut Naalakkersuisoqarfimmit tamanut kaammattuutigaarput nersornaammut piukkunnartumik nalunngisaqarpata

6. marts 2015 -iutinnagu Naalakkersuisoqarfimmut innersuussuteqaqqullugit.

Innersuut tunngavilersugaassaaq innersuummillu nassiussisumut/nut attaveqarfissat ilanngunneqarsimassallutik.

 

 

 

Atassuteqarfissaq:

Pinngortitamut, Avatangiisinut Inatsisinillu Atuutsitsinermut Naalakkersuisoqarfik

Postboks 1614

3900 Nuuk         

Email: paian@nanoq.gl, nhlm@nanoq.gl     

tlf. 346718