Angalaqatigiittartut atorluarneqartut

Inersimasut meeraanerminniillu kinguaassiutitigut atornerlungaasimasimanermik kingunerisaanik atugarliuuteqarnerminni Angalaqatigiittartunit katsorsarneqartalersimanerat assorsuaq tigulluarneqartoq malunnarpoq.

Tusagassiortunik katersortitsineq

Septembar 2013-mili Angalaqatigiittartut suliniuteqarnerat aallartinneqarmalli nunatsinni najugaqarfippassuit tikinneqareersimalerput, soorlu Uummannaq, Aasiaat, Sisimiut, Paamiut aammalu Maniitsoq suliniuteqarfigisimallutik. Angalaqatigiit ungasinngitsukkut sulinertik Qaqortumi aamma allartippaat, tamatumani atorfillit susassaqartut ataatsimeeqatigineqarsimallutik, taamatulli innuttaasut katsorsarneqarnissartik siunertaralugu saaffiginnissimasut oqaloqatigineqarsimallutik.

Angalaqatigiit sulinertik aallartimmassulli innuttaasut 245-t saaffiginnissuteqarnikuusimapput. Manna tikillugu inersimasut 182-t meeraanerminni pisimasut kingunerluttoorutigisimasatik pillugit katsorsarneqarsimanngikkunik Angalaqatigiit tarnip pissusaannut katsorsaasuinit suliniuteqarfigineqareersimalerput.

Naalakkersuisut Angalaqatigiittartut april 2013-mi pilersissimavaat, taakku tarnip pissusaannik ilisimasaqartuupput namminersortut, ukiunilu qaangiuttuni inersimasunik katsorsaasarnermikkut annertuumik tutsuiginartumillu misilittagaqalersimasuullutik.

Nunatsinnimi inersimasut ikigisassaanngeqisut meeraanerminniilli kinguaassiutitigut innimitsaalliorfigineqarnikuusimapput, tamatumali kingunersaanik assigiinngitsutigut inuttut tarnimikkullu kingunerlutitsillutik. Tamatumani Angalaqatigiittartut katsorsaasarnermikkut ikiorsiiniartussaapput, aqqutissiuusseqataaniarfigissallugulu pineqartut tamatuma kingorna inoqatimik, ilaquttamik suliffeqarnerullu tungaatigut pitsaanerusumik ingerlaaseqarsinnaalernissaat.

Tusagassiortunik naapeqateqarnermi Angalaqatigiittartuni ilaasortat tarnillu pissusaanut ilisimasallit Naja Lyberth aamma Inuk L. Bourup-Nielsen, Naalakkersuisoq Martha Lund Olsen-i peqatigalugu Angalaqatigiittartut suliniuteqartarnerat pillugu misilittakkaminnik saqqummiussaqassapput. Tarnip pissusaanik ilisimasallit inuit suliniuteqarfigisatik pillugit nipangiussisussaatitaanerat tunngavigalugu suliniuteqarfigineqartut ataasiakkaat pillugit saqqummiussaqarsinnaanavianngillat, taamaattumillu misilittakkat pillugit siammasinnerusumik saqqummiussaqassallutik.

Angalaqatigiit pillugit naatsumik:

  • Angalaqatigiittartut april 2013-mi Naalakkersuisunit pilersinneqar-poq, tamatumali kingorna septembar 2013-mi sulinertik aallartissimallugu. 
  • Angalaqatigiittartut manna tikillugu suliniuteqarfigisimavaat Uummannaq, Aasiaat, Paamiut, Maniitsoq, Sisimiut aammalu Qaqortoq. 
  • Angalaqatigiittartut 245-init saaffiginnissuteqarfigineqarsimapput. 
  • Angalaqatigiittartut inersimasut 182-t meeraanerminniilli kinguaassiutitigut atornerlunneqarsimanertik pissutigalugu kingunerlutitsisut katsorsarsimavaat.

 

Paasisarnerorusukkaanni saaffigisassaq:
Imm. pisortaq Ellen Magnussen, ello@nanoq.gl imal. oqar.nr. 34 66 20