Inerisaavik

Inerisaavik Aqutsisoqarfittut nutaatut Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfiup ataani inissisimalissaaq.

Naalakkersuisut ulloq 5. februar 2015 ataatsimiinnerminni tunngaviusumik aalajangiipput Inerisaavik maanna aaqqissuussaanikkut Ilisimatusarfiup ataani Ilinniarnermik Instsitutimi immikkoortortatut inissisimasoq aaqqissuussaanikkut allanngortsitinikkut Aqutsisoqarfittut Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfiup ataani inissisimalissasoq.

Aalajangerneq pillugu Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Nivi Olsen imatut oqaaseqarpoq:

”Naalakkersuisutut sulininni annertuumik qitiutitama ilagaat meeqqat atuarfiata nukittorsarneqarnissaa. Taamaattumik pisariaqartippara Inerisaaviup aaqqissuussaanikkut inissisimanerata nukittunerulernissaa, ingerlatsinermi malunnarsisimammat immikkoortortatut ingerlatsivik Naalakkersuisut meeqqat atuarfiannut tunngasumik inatsit naapertorlugu pisussaaffitsinnik naammassinninniarnitsinni atugassarput, Naalakkersuisut aaqqissuussaanikkut susassaqarfiisa avataanni inissisimasoq.”

Meeqqat atuarfiannut tunngasumik inatsisit atuuttut pisariaqartippaat Naalakkersuisut isumagissagaat siunnersuisartunik kiffartuussisoqarnissaa, ilinniusiornikkut ineriartortitsisoqarnissaa, pikkorissaasoqartarnissaa kiisalu ilinniaqqittarnermik ingerlaqqiffiusumillu ilinniagaqartarnermik ingerlatsisoqarnissaa, ilinniartitsisunut pisortaasunullu sammititaasunik, aammalu ilisimatusarnikkut ineriartortitsinikkullu ingerlatsisoqarnissaa, kiisalu meeqqat atuarfiata ingerlatsineranik nalilersuisoqartarnissaa. Inerisaaviup Ilinniarfissuaq suleqatigalugu suliat pineqartut ullumikkut akisussaaffigai.

Naalakkersuisut naatsorsuutigaat Inerisaaviup aaqqissuussaanikkut inissisimanerata allanngortinneqarnera, Ilisimatusarfiup pisortaanik aamma KANUKOKA-mik oqaloqateqartareernikkut aalajangiunneqartoq, Naalakkersuisoqarfimmi ineriartortitsinikkut suliniutit ingerlanneqarneranni sakkussanik amerlanerusunik pilersitsinermik kinguneqassasoq, taamaalu meeqqat atuarfiat pillugu inatsisip atortuulersikkiartuaarneqarnerani suliniutinut nukittorsaataassalluni.

Ilinniartitsisutut ilinniartitaaneq kiisalu meeqqat atuarfianni sulisut ilinniaqqittarnerat ingerlaqqiffiusumillu ilinniagaqartarnerat Ilisimatusarfiup ataani Ilinniarnermik Instsitutimi inissisimaannassapput, kisiannili ilinniaqqittarnermut ingerlaqqiffiusumillu ilinniagaqartarnernut aningaasaliissutit ukiumoortumik naammassisassanut tunngasumik Ilisimatusarfiup aamma Ilinniartitaanermut Naalakkersuisoqarfiup isumaqatigiissuteqartarnerisigut aqunneqassallutik. Naammassisassanut isumaqatigiissut pikkorissaanerit, ingerlaqqiffiusumik ilinniagaqartarnerit ilinniaqqittarnerillu siunissami ingerlanneqartussat amerlassusissaannik suunissaannillu imaqassaaq.

Annertunerusumik paasisaqarniaraanni Naalakkersuisoqarfimmi Pisortaq Mikael Kristensen, oqarasuaatikkut 345000 attavigineqarsinnaavoq.