Knud Kristiansen politikkikkut siunnersortimik atorfinitsitsivoq

Naalakkersuisup Knud Kristiansenip tusagassiortoq Jensine Berthelsen politikkikkut siunnersortitut atorfinitsippaa. Jensine Berthelsen 50-inik ukioqarpoq aammalu 1998-imi tusagassiortutut ilinniarnerminik naammassilluni, ilaatigullu Kalaallit Nunaata Radioani, najukkami radiumi kiisalu sinerissami sumiiffinni assigiinngitsuni TV-qarfinni misilittagaqarluni.

Jensine Berthelsen politikkimik suliaqarnermik misilittagaqarluarpoq, siornatigullu Ineqarnermut Naalakkersuisunut Siverth K. Heilmannimut allatsitut sulisimalluni. Aamma Jensine Berthelsen ukiorpassuarni Atassummi partiimut allatsitut sulinermik misilittagaqarsimavoq.

Jensine Berthelsenip atorfinitsinneqarnerani Ineqarnermut Naalakkersuisoq Knud Kristiansen suliatigut politikkimillu suliaqarnermini nukittunerulersinneqassaaq.