Tusarniaaneq: Aalisariut aserorterneqartillugu akuersissut annaaneqassanngitsoq

Aalisariutillip aalisariutini ullumikkut aserortittussanngoraangamiuk aalisarsinnaanermut akuersissutini annaasarpaa.

Aalisarnermut, Piniarnermut Nunalerinermullu Naalakkersuisoqarfiup aalisarnermut aningaasaliissutinut immikkoortitat pillugit Inatsisartut inatsisaata allannguutissaatut missingiut nutaaq tusarniaassutigalu ullumi nassiuppaa.

Siunnersuummut tunngaviusumik tunuliaqutaavoq kalaallit aalisariutaannit isaterinissamut atatillugu tapiissuteqartarnermi piumasaqaatit sakkukillisinneqarnissaat.

Aalisartut arlallit angallatiminnik ullumikkut isatererusunneq ajorput aalisarnissamut akuersissutiminnik annaasaqartaramik.

Siunnersuut maanna nassiunneqartoq, annertunerpaartamigut 2014-imi ukiakkut ataatsimiinnermi siunnersuutip saqqummiunneqartup assigaa.

Naalakkersuisulli kissaatigisimavaat siunnersuutaasimasumut sanilliullugu allannguutissamik ilanngussisoqassasoq.

Taamaattumik § 1, nr. 2-mi, § 14-imi, imm. 2-mi, nutaatut nr. 5 ilanngunneqarsimavoq, kiisalu § 1-imi, nr. 4, § 16-imi, nutaamik imm. 4-imik ilanngussisoqarsimalluni.

Allannguinerit tamakku tunngavigalugit, siunnersuut 2015-imi upernaakkut ataatsimiinnermi saqqummiunneqassanngilaq.

Tusarniaanermi akissuteqaataasinnaasut ilanngussuunneqareerpata, naatsorsuutigineqarpoq siunnersuut 2015-imi ukiakkut ataatsimiinnermi saqqummiunneqarsinnaassasoq.

Februaarip arfernanit marsip 13-iannut 2015 nalunaaqutaq 12.00 tusarniaasoqassaaq.

Tusarniaanermi akissuteqaataasinnaasut uunga nassiunneqassapput apnn@nanoq.gl.

 

Kathrine Ødegård, inatsisileritooq, Aalisarnermut, Piniarnermut  Nunalerinermullu Naalakkersuisoqarfik apnn@nanoq.gl