Kruse: Nuup kangerluani qaleralinniarneq killilersorneqarli

- Nuummi aalisartut Nuup kangerluani qaleralinnut killilersuilernissamik isumaqarnerat tapersersorpara, Aalisarnermut, Piniarnermut Nunalerinermullu Naalakkersuisoq, Karl-Kristian Kruse, Nuummi  aalisartut piniartullu peqatigiiffiannik ataatsimeeqateqareerluni oqarpoq.

Nuummi aalisartut Nuup kangerluani qaleralinniarnerat aqutsiveqarfinni Qeqertarsuup Tunuanitut, Uummannatut Upernavittullu aqunneqanngilaq, soorlu aamma nunatta sinneratut aqunneqanngitsoq. Nuummi aalisartut killeqanngitsumik kangerlummi qaleralinniarsinnaallutik.

Ataatsimeeqataasut arlallit isumaqarput Nuup kangerluani qalerallit killilersorneqalernissaat piffissanngortoq, takusinnaagamikku tamaani qalerallit ikiliartuinnartut aamma aalisartut amerlasuut qaleralinniartartut amerlasuunillu  pisaqartarlutik.

Nuummi Aalisartut Peqatigiit ernummatigivaat aalisarsinnaasut killilerneqanngippata qaleralik 1980-kutut nungullugu aalisarneqarnissaa.

Nuup kangerluani qalerallit 1980-ikkunni pisarineqartartut amerleriarput, 1985-mi aalisarneqartut amerlanerpaallutik, 2.100 tonsit pisarineqarlutik.

Ukiut tulliini ikilerujussuarput 1989-mi aalisarneqarunnaarlutik.

Nuup kangerluani 2009 tikillugu annerusumik qaleralinniartoqanngeriarluni 2009-mi qaleralinniartoqaqqilerpoq, ukioq taanna 200 tonsit tulaanneqarlutik.

Ukiut tulliini tulaanneqartartut amerleriartorujussuupput, ukiuni kingullerni marlunni 1.000 tonsit aalisarneqartarlutik.

Pinngortitaleriffik Aalisarnermut, Piniarnermut Nunalerinermullu Naalakkersuisoqarfimmut siorna innersuussuteqarluni allappoq Nuup kangerluani siunissami 500 tonsit sinnerlugit qaleralittarineqartassanngitsut. Taama amerlatigisut 1963-mit 1983-mut aalisarneqarmata, ikiliartuutaanngitsumik aalisarneqarmata – piujuaannartitsisoqarluni.

- Qanga qanoq amerlatigisunik aalisartarsimanerup  soqutiginaateqalersippaa siunissami aalisartarnissamut qaleralinnillu aqutsinissamut, Pinngortitaleriffik siorna allappoq.

Avannaani, Qeqertarsuup Tunuani,  Uummannami Upernavimmilu, qaleraleqarfiit iigartartunik kangerlunniittarput, aalisarneqarsinnaanatik aalisarniarneralluunniit ajornarsinnaasarluni.

Karl-Kristian Kruse isumaqarpoq Nuup kangerluani qaleralinniartarneq aqunneqartariaqalersoq,  qaleraliillu qanoq amerlatigisut pisarineqartarnissaannik aalajangersaasoqartariaqarluni. Ilanngullugu oqaatigaa qaleralittassiissutigineqartartussat aalisariutinut umiatsiaaqqanullu avinneqartarnissaannik innersuussisoqartariaqartoq.

- Periarfissaq siullerpaaq atorlugu Naalakkersuisunut Nuup Kangerluani qaleralinniartarnerup aqunneqarnissaanik tunngavissiaq saqqummiutissavara, Karl-Kristian Kruse erseqqissaavoq.

Naalakkersuisunut ilaasortap ilanngullugu kissaatigivaa qaleraleqarfiit allat sinerissami sumiikkaluartulluunniit piujuartitsinermik  tunngaveqarluni aalisarneqartarnissaat, taakkua ilanngullugit aamma aqunneqalissallutik.

Paasissutissat:

Pinngortitaleriffik qalerallit angissusaannik 1973-mit 2013-mut uuttortaasarpoq. Uuttortaasarnerit takutippaat qalerallit 1973-mit 1985-mut aalisarneqartut angissusaat 68 centimeterit missaanniittartut. Qalerallit ningittakkanik qassutinillu aalisarneqartarlutik. 1984-mit 1986-mut qaleralinnialeruttorfiup nalaani qalerallit mikinerulerput 58 centimeterit missaanniilerlutik. 1994 aalisarneqanngikkaluarlutik 53 centimeterit missaanniillutik. 2009-mi qaleralinniarneq aallarteqqinneqarmat qalerallit 60 centimeterit missaanniipput, 2013-imi 52 centimeterit missaanniilersimallutik.

Tusarfik: Pinngortitaleriffik

Allaaserisamut tunngasumik saaffiginnittoqassappat unnga saaffiginnittoqassaaq: Jørgen Isak Olsen, Aalisarnermut, Piniarnermut Nunalerinermullu Naalakkersuisoqarfimmi pisortaq. E-mail: jio@nanoq.gl