Nuummi umiarsualiviliornissamut suliakkiisut

Sikuki

Sikukip Nuummi umiarsualiviliortussatut suliakkinniarlugu aallartisaataasumillu suliamik aallartitsisussatut toqqagaa Naalakkersuisut sisamanngornermi januaarip 29-anni akueraat.

Tamanna tunngavigalugu Sikuki Nuuk Harbour A/S-ip Per Aarsleff Grønland ApS piumasaqaatitalimmik isumaqatigiissuteqarfigaa Nuummi containerinut nutaamik terminaliliussasoq. Pilersaarusiorlunilu piareersarnerit siulliit maanna aallartinneqarput. Inaarutaasumillu isumaqatigiissut qaammatit marlussuit qaangiuppata piariissangatinneqarpoq.

Isumaqatigiissut tamakkerlugu 402 million koruuninik naleqarpoq tamakkiisumillu sanaartortitsisoqassalluni. Sanaartorneq marsip aallartinnerani aallartinneqassaa 2016-imilu novembarimi piariissangatinneqarluni. Isumaqatigiissummiipput containerinut terminali, ilanngullugu tulattarfik 300 meterit missaanniittoq, containerinut ilioraaffissaq aamma tulattarfiullu eqqaata itisilerneqarnissaa. Sanaartornermi allaffiit, quersuaq sullivillu aamma ilanngunneqassapput.

Sanaartornerni kalaallit annertuumik sulisoriniarneqarput, taakkunani ilinniarsimasut, ilinniarsimanngitsut, praktikkertut ilinniartullu ilaallutik. Kalaallit sulisut katillugit ukiumut piffissaq tamaat 90-iussapput.

Naalakkersuisut Siulittaasuat Kim Kielsen oqarpoq:

”Kalaallinik sulisoqarnissaq ilinniartuuteqarnissarlu pingaartitaralugit Aarslef Grønland A/S-ilu isumaqatigiissuteqaratta kalaallinut nuannersuuvoq. Suliniutit taamaattut Kalaallit Nunaanni aningaasarsiornikkut ilorraap tungaanut aallartitsiniaqataassapput.”

 

Paasisaqarnerorusuttut attavigisinnaavaat Ingerlatseqatigiiffinnut Allattoqarfimmi pisortaq Rasmus Pedersen, oqarasuaat +299 34 50 00 imaluunniit e-mail rasp@nanoq.gl.