Nunaqavissut avaleraasaartoorniarnermi salliussapput

Karl-Kristian Kruse KNAPK-mut: Nunaqavissut avaleraasaartoorniarnermi salliutinneqassapput

- Nunatsinni ingerlatseqatigiiffinnut namminneerlutik kilisaataatilinnut aalisariutaatilinnullu Naalakkersuisut aalisakkanik pisassiisarnerminni salliutitsisassallutik politikkeqarput. Tamanna ukioq manna avaleraasartoorniarnissami allaanerussuteqarnavianngilaq, Aalisarnermut, Piniarnermut Nunalerinermullu Naalakkersuisoq Karl-Kristian Kruse KNAPK-mut marlunngormat, januaarip 27-anni, pulaaqqaartilluni erseqqissaavoq.

KNAPK Naalakkersuisuni ilaasortamut erseqqissaavoq avaleraasartoortassat pisassiissutigineqassatillugit nunaqavissut salliutinneqartassammata.

Karl-Kristian Kruse KNAPK-mut ilisimatitsivoq Aalisarnermut, Piniarnermut Nunalerinermullu Naalakkersuisoqarfik qanittukkut ilisimatitsissuteqassasoq avaleraasartoorniarnissamut qinnuteqarsimasut pillugit qanoq pingaarnersiuisoqassanersoq.

Avaleraasartoorniarnissamut siorna qinnuteqartut pingasunngorlugit pingaarnersiugaapput. Kalaallit aalisariutaataat salliutinneqarlutik, aalisariutilluunniit nunatsinneersunit inuttalerlugit attartorsinnaallutik. Tulliulluni kilisaataatillit kilisaatiminnik aalisartitsisut aalisariummik attartorlutik aalisartitsisinnaallutik. Pingajuullutik ingerlatseqatigiiffiit kilisaataateqanngitsut.

KNAPK-p kissaatigaa sinerissap qanittuani saarullittassat 40.000 tonsinut amerlaneqassasut. Tamannalu Naalakkersuisunut ilaasortap kissaatigineqartoq naapertorlugu pisassiisoqarsinnaaneranik ilisimasaarisinnaannginnerarpoq sinerissap qanittuani saarullinnut paasissutissat killeqaqimmata.

- Naalakkersuisut sinerissap qanittuani ukioq manna saarullittassat pillugit ullut 14-init qaangiutsinnagit aalajangigaqartussaapput, soorlu aamma avataani saarullinniarnissamut apeqqut aamma oqaluuserineqassasoq, Karl-Kristian Kruse oqarpoq.

Assigiimmik raajartassat

Nunatta kitaani raajarniarnermi avataasiortut sinerissallu qanittuani raajarniartut immikkut pisassinneqartarput. Pisassiissutinit avataasiortut 57 procentinik raajartassinneqartarlutik sinerissap qanittuani raajarniartut 43 procentinik. KNAPK-p kissaataasa annersaraat pisassiissutigineqartut aveqqinneqaqqissaarnissaat.

- Soorunalimi kissatigineqartoq aalisarnermut inatsisip allanngortinneqarnissaata suliarineranut allaqqussinnaanngitsumik ilanngunneqassaaq, Karl-Kristian Kruse oqarpoq, Naalakkersuisoqarfimmilu suliaqartut inassuteqaatissaat qilanaaralugu, tamatumani aalisarnermik inuussutissarsiuteqartut aamma suleqataallutik.

KNAPK ilanngullugu saqqummiuppaa umiatsiararsortut  atugaannik pitsanngorsaasussanik suleqatigiissitamik pilersitsisoqassasoq. Suleqatigiissitap suliaa isumasioqatigiinnermik naggaserneqassalluni.

- Tamanna aamma SQAPK-mit kissaatigineqarpoq, Karl-Kristian Kruse oqarpoq. Erseqqissaallunilu Naalakkersuisut aningaasanut 2015-imut inatsisissatut siunnersuummut isumasioqatigiisitsinissamut immikkoortitsisimanngimmata. Tamanna aalisarneq pillugu 2014-imi isumasioqatigiisitsimanermik tunngaveqarmat, tamatumani qaleralinniarneq aamma pillugu oqaluuserinnittoqarsimammat.

 

Attavissaq: Jørgen Isak Olsen. Aalisarnermut, Piniarnermut Nunalerinermullu Naalakkersuisoqarfimmi pisortaq. E-mail: jio@nanoq.gl.