Kangaatsiami qimmeq terianniamik kiineqarpoq

Kangaatsiami qimmeq terianniamik sapaatip akunnerani matumani saassunneqarlunilu kiineqarpoq – terianniaq perlerornermut akiuussutissaqareerpoq. Terianniaq toqunneqarpoq.

- Pisup uppernarsiseqqippaa pingaaruteqarluinnarmat qimmit perlerornermut akiuussutissamik kapitinneqarsimanissaat, uumasut nakorsaat Sanne Eline Eline Wennerberg, Ilulissat, erseqqissaavoq, oqaluttuarlunilu kommune politiillu Kalaallit Nunaanni Uumasunut Nakorsaqarfik Inuussutissalerinermullu Oqartussaaffimmut erngerlutik ilisimatitsisimammata.

- Pingaaruteqarluinnarpoq taama pisoqartillugu ilisimatitseqatigiinnissaq, Sanne Eline Wennerberg oqarpoq, kommunimut politiinullu erngertumik ilisimatitsisimanerinut nersorinnilluni.

Qimmeq ulluni tulliuttuni 30-ni immikkut nakkutigineqassaaq.

-Qimmip tunillatsissimannginnissaa qularnaarniarlugu immikkut nakkutigineqarpoq. Tamanna asuliinnagassaanngilaq, ingammik perlerorneq pineqartillugu, uumasut nakorsaat oqarpoq.

Terianniat illoqarfinnut nerisassarsiorlutik qanillattortarput. Uumasunut Nakorsaqarfik Inuussutissalerinermullu Oqartussaaffik kajumissaarivoq igitassat, soorlu aalisakkanit piniakkaniillu, terianniat pallissinnaanngisaannut inaalinneqartassasut.

Qimmeqartup qimmini perlerornermut akiuussutissamik kapitissimassallugit akisussaaffigisussaavaa, kapitinneqarsimaneranillu ilisarnaammik qungasequtilersimanissaa aamma isumagisussaallugu.

Kommunip qimmilerisua akiuussutissamik kapisisartuuvoq. Kommunit qimmiutillit qassiniunerinik nalunaarsuisussaavoq qimmillu qassit aamma kapitinneqarsimanersut qularnaarsimassaallugit.

 

 

Attavigineqarsinnaavoq: Uumasut nakorsaat Sanne Eline Wennerberg. E-mail: sawe@nanoq.gl aamma uumasut@nanoq.gl.