Kalaallit Nunaata assinga nutaaq

Qarasaasiaq nutaaq atorlugu Kalaallit Nunaata assiliortorneqarneratigut nunarsuarmi qeqertat annersaat maanna nutaaliaasumik nunap asseqalissaaq, inuiaqatigiinni ingerlatanut annerusumillu isumannaallisaanermut ataavartumik iluaqutaasussamik.

Nunarsuatsinni qeqertat annersaat qarasaasiakkut atortorissaarut digital-imik ilusilersorneqassaaq soorlu avatangiisinut, takornariaqarnermut upalungaarsimaniarnermullu iluaqutaasussamik. Nunap assinga nutaanngililersoq kiisalu sermersuup aakkiartortup Kalaallit Nunaata nunataa allanngoriartortup nutaamik digital-imik nunap asseqalernissaa pisariaqartilersimavaa.

Siullermik aallarniutitut suliniutigalugu Kalaallit Nunaata ilaa Danmarkimit marloriaatingajammik annertussusilik ukiut tulleriit pingasut atorlugit assiliortorneqassaaq. Suliamiillu tassannga misilittakkat Kalaallit Nunaat tamarmi nunap assiliortorneqarnissaanut nalilersuutaassapput.

”Kalaallit Nunaata assinga maanna atuuttoq piffissamit allaminngaanneersuuvoq. Eqqoqqissaanngilaq sumiissusersiummilu GPS-imi atorneqarsinnaanani. Nunap assingi amigaateqarput assersuutigalugu upalungaarsimaniarnermut, pitsaasumik pinngortitami avatangiisinilu aqutsinermut kiisalu mingutitsinerup akiorniarneqarneranut atorneqarsinnaanatik. Tamanna iliuuseqarfiginialerparput, digital-imillu assiliorneq avatangiisinut, upalungaarsimanermut kalaallinullu tamanut iluaqutaassaaq,” taama oqarpoq avatangiisinut ministeri Kirsten Brosbøl.

Sillimaniarnermut inuussutissarsiutinillu ineriartortitsinermut iluaqutaassaaq

Eqqoqqissaartumik aamma suliarilluakkamik nunap asseqarnissaq inuiaqatigiinnut kalaallinut pingaartuuvoq assersuutigalugu upalungaarsimaniarnermut pinngortitamilu angalasunut sillimaniarnermut.

”Nunap assinga nutartigaq inuussutissarsiutinik ineriartortitsinermut aamma iluaqutaassaaq, Anda Uldum, Aningaasaqarnermut Aatsitassanullu Naalakkersuisoq, oqarpoq nangillunilu:

”Nuannaarutigisorujussuuara sukumiisumik eqqoqqissaartumillu digital-imik nunap assilialiornissap maanna suliniutiginissaa tunngavilerneqarmat. Nunap pisuussutaanik atuilluni inuussutissarsiornikkut ineriartortitsinermi nutartikkamik tunngaviusumik nunap asseqartariaqarpoq Aatsitassanik ikummatissanillu ujaasinermut atuinermullu nunanit allanit aningaasaliisussanik kajumilersitsiniarnitsinni Kalaallit Nunaat nunanit allanit unammillerneqarpoq. Unammilleqatigiinnermi nunap assingi takutitsilluarsinnaasut aalajangiisooqataapput aningaasaleerusussutsimillu siuarsaaniarnermi pisariaqarlutik,” Anda Uldum oqarpoq.

Kalaallit Nunaat immikkoortortanut sisamanngorlugu, Danmarkip angissusaata marloriaatingajaannut agguarlugu, ukiuni 2014-miit 2017-imut assiliortorneqassaaq.

Suliffeqarfik Geodatastyrelsen nunap assiliortorneranut akisussaasuuvoq, sulinerlu Namminersorlutik Oqartussat Asiarlu qanimut suleqatigalugit ingerlanneqassalluni. Nunap assinginut pisariaqartitsinerit assigiinngitsut naammassinissaat qulakkeerniarlugu suliamut attuumassuteqartut amerlasuut suleqatigineqassapput.

Aallartitsissutaasumik suliniummut aningaasartuutaasussat (15 mio.) A.P. Møller og Hustru Chastine Mc-Kinney Møllers Fond til almene Formaal-imit aningaasaliiffigineqarput.

Paasisaqarnerorusuttut attavissaat:

Tusagassiortunik sullissisoq Jens Fuglsang, Miljøministeriet, tlf. +45 9135 6996, e-mail: jefed@min.dk

Immikkoortortami pisortaq Georg Jensen, Geodatastyrelsen, mobil: +45 2561 6688, e-mail: gj@gst.dk

Immikkoortortami pisortaq Thomas Gaarde Madsen, Aningaasaqarnermut Naalakkersuisoqarfik, tlf. +299 345415, e-mail: thga@nanoq.gl