Ingerlatsinissamut pilersaarut annaassinissamut pilersaarutaanngilaq

Kim kalender 3

NunaMinerals A/S-ip pisortaanera Ole Christiansen Sermitsiaq.AG-mut ippassaq oqarpoq, NunaMineralsip selskabip ingerlannissaanut pilersaarut 2014-2017 oktobarip 17-anni 2014-imili tunniukkaa, tassanilu anguniakkat aningaasaqarnikkullu pisariaqartitat saqqummiunneqartut.

Taamatut oqaaseqarneranut tunngatillugu Naalakkersuisut erseqqissaatigissavaat ingerlatsinissamut pilersaarut tassaanngimmat selskabip qanoq ingerlariaqqinnissaanut pilersaarut, pilersaarut novembarip 27-anni 2014 taarsigassarsititsinermut atatillugu Naalakkersuisunit piumasarineqartoq – ingerlatsinissamut pilersaarutip saqqummiunneqarneranit qaammat sinnerlugu qaangiuttoq.

Naalakkersuisut SIulittaasuat Kim Kielsen oqarpoq:

“NunaMinerals A/S-ip 4,5 million koruuninik Namminersornerullutik Oqartussanit taarsigassarsinermut atatillugu piumasaqaatit nammineq atsiorpai. Piumasaqaatini erseqqissumik allassimavoq selskabi ingerlariaqqinnissamut nutaamik piviusorsiortumik pilersaarusioqqissaassasoq. Naalakkersuisut ingerlariaqqinnissamut pilersaaruteqarnissamik aningaasaqarnikkullu missingiusiornissamik piumasaqaataannik NunaMinerals naammassinnissinnaasimanngilaq. Ingerlatsinissamut pilersaarut Naalakkersuisut piumasaannut annaassinissamik pilersaarutaanerassallugu kukkuneruvoq.”