Imermik sassaallerfik, eqqakkanik uumasuliat aqerluusallu naasinnaasut!

Innuttaasut 1000-it missaanniittut Unnuk Kulturisiorfik atorluarlugu Pinngortitamut, Avatangiisinut Inatsisinillu Atortitsinermut Naalakkersuisup Mala Høy Kúkop allaffia Napasuliami init quleriit arfineq pingajussaanniittoq alakkarpaat isikkivialu alianaarsaarfigalugu.

Naalakkersuisoq naalakkersuisoqarfimmut tikilluaqqusivoq, tassanilu pulaartut ilaatigut uumasunut nungutaanissamut ulorianartorsiortunut kiisalu silap pissusianut nukissiornermullu apeqqutit eqquiniutigalugit misiliipput.

Meeqqat eqqakkat atorlugit kusanartunik uumasuusaliorput, aammalu Qujanaq pillugu paasititsiniaanermit videoliat ilisarnartut naalakkersuisoqarfiup filmertarfiani takutillattaarneqarput.

Aamma aqerluusat naatinneqarsinnaasut pulaartunut tamanut agguaanneqarput. ”Pisiniartarnerput eqqaasarnerpullu eqqarsaatigisussaavarput, unalu tassaavoq ulluinnarni ”sakkutsinnit” nalinginnaanerpaaq: tassalu aqerluusaq. Aqerluusap sinnera iginngikkaluarlugu naasulivimmut ikkussinnaavarput, sapaatillu akunnerisa sisamat qaangiunnerini naasunngussaaq kusanartoq”, Naalakkersuisoq Mala Høy Kúko nassuiaavoq.

Kiisalu aamma imermik sassaallerfik kusanartoq ilaatinneqarpoq, tassanilu pulaartut Qallussuarmiit kiisalu Nuummi imeqarfinnit assigiinngitsunit pingasuniit imermik misiliisinnaapput, aammalu illoqarfimmi imeq imigassaq pillugu annertunerusumik tusarnaagaqarsinnaallutik.

”Innuttaasunit amerlasuut maani Naalakkersuisoqarfimmi takullugit nuannerpoq, aammalu ulluinnarni avatangiisinut mingutsitsinnginnerusumik iliuuserisinnaasagut pillugit inunnik oqaloqatiginningaatsiarpunga”, Mala Høy Kúko naammagisimaarinnittoq oqarpoq.

Aamma pulaartorpassuit naalakkersuisoqarfinnut allanut, matuminnik ammatitsiniarlutik aalajangersimasunut aqqusaarniarlutik aalajangersimapput, taakkununngalu Siulittaasup Naalakkersuisoqarfia aamma Ilaqutariinnermut, Naligiissitaanermut Isumaginninnermullu Naalakkersuisoqarfik ilaapput.

Pinngortitamut, Avatangiisinut Inatsisinullu Atortitsinermut Naalakkersuisoqarfimmi 2015-imi Unnuk Kulturisiorfik pillugu apeqqutissaqartoqaruni annertunerusumillu paasisaqartoqarusukkuni allaffimmi pisortaagallartoq Karen Anne Arleth, knar@nanoq.gl, telefon 551585-imut attaveqarfigineqarsinnaavoq.