NunaMinerals A/S aningaasaliisussanik amigaateqarpoq

NunaMinerals A/S immikkut ittumik ataatsimeersuartitsinissamut sisamanngorpat januaarip 29-anni 2015 aggersaavoq, selskabip siunissaa piginnittunit aalajangerneqassalluni. Selskabimik piginneqataasut ullumikkut 3.000-ingajaapput, taakkunanngalu annerpaamik piginneqataassuteqartut tassaallutik LD 16,9 %-inik (Lønmodtagernes Dyrtidsfond), Nykredit 9,7 %-inik aamma Namminersorlutik Oqartussat 29 %-inik kiisalu Greenland Holding A/S 4,3 %-inik piginnittut. Selskabimik piginnittut sinneri annikitsunnguakkaanik piginneqataasuupput, taakkunannga kalaallit arlaqarlutik.

Naalakkersuisut Nuna Mineralsimut ukiut ingerlaneranni aningaasaliissuteqartarsimavoq, piginneqataasullu allat assigalugit pakatsissutigaat aatsitassarsiornissamik nutaamik pissanganartumik iluanaarutissarsisimanngimmat selskabillu ingerlanneqarnerata aningaasalersornissaanut suliniutinillu ilimanaateqarnerpaanut ineriartortitsinissamut pilersaaruteqanngimmat.

Ataatsimeersuarnissamut tunngatillugu Naalakkersuisut piginneqataasunit kisiartaallutik NunaMineralsip siunissami ataannarnissaanut aaqqiissutaasinnaasumik siunnersuuteqarsimapput.

Naalakkersuisut Siulittaasuat Kim Kielsen oqarpoq:

”NunaMinerals ajoraluartumik nammineerluni selskabip ingerlateqqinnissaanut pilersaarummik saqqummiussisimanngilaq. Tamanna uggornarpoq, ingammik Naalakkersuisut novembarip 27-anni 2014-imi 4,5 mio. koruuninik taarsigassarsititsinerminni selskabip nutaamik pilersaarusiorneqarnissaanik siunnerfilerneqarnissaanillu piumasaqarnerat eqqarsaatigalugu.

Tassani Nunatsinni koruuninnguit tamaasa mumittaartariaqarlugit aningaasaqarnikkut inissisimanerput akileraartartuttalu aningaasaataannik Naalakkersuisut toqqarneqarsimanerput ingammik eqqarsaatigisariaqarput.”

Selskabip siunissaa qulakkeerniarlugu pilersaarummik Naalakkersuisut saqqummiussimmatali NunaMineralsimi piginneqataasut oqaatigisarpaat selskabimut aningaasaliissutitik annaassagitsik.

Naalakkersuisut tassunga tunngatillugu erseqqissaatigerusuppaat selskabimut aningaasaliissutigineqasimasut tamarmik annaaneqareermata. Selskabimik nalikillisaanermut selskabip aningaasaateqanngivinneranut akiligassanillu akiliisinnaannginneranut ersiutaavoq.

Kim Kielsen oqarpoq:

”Siunnersuuterput, tamakkununnga tunngatillugu malittarisassanik atuuttunik unioqqutitsinngitsoq, sisamanngorpat itigartinneqariaannaavoq. Allanilli massakkuugallartoq siunnersuuteqanngilat, taamalu qaammatip naanerani akiligassanut akissaqassaqarniarluni selskabi tuaviornerpaamik  aningaasassaaleqilissaaq. Aningaasaleerusuttut allat piginneqataalerusuttut tikilluaqqusaapput. Immikkut ittumik ataatsimeersuarnissap tungaanut periarfissaqarput.

Maannamut selskabimik annaassiniarluni allamik pilersaaruteqanngilaq, unneqqarissumillu oqaatigissagaanni siulersuisut aktiaatilinnut paasissutissanik apuussaqartarsimanngillat. Tamannalu selskabimut iluaqutaasimanngilaq. Aqutsinerliortoqarpoq, taakkulu aningaasaliisartut mianersornerannik pissuteqartumik aningasaliisussarsisinnaannginnerannik saniatigut eqqugaallutik. Naalakkersuisut NunaMinerals A/S-ip matunissaa kissaatiginngisaannarsimavaat. ”

 

Paasisaqarnerorusuttut Naalakkersuisoqarfimmi pisortaq Svend Hardenberg attavigisinnaavaat, oqarasuaat +299 34 50 00 imaluunniit e-mail govsec@nanoq.gl.