Suleqatigiinneq tamanut atuuppoq

Inuit Ataqatigiit siulittaasuata Sara Olsvigip danskit aviisianni Informationimi Naalakkersuisut isornartorsiorpai – nammineq isummani malillugu – Naalakkersuisut suleqatikkuminaannerarlugit. Naalakkersuisut tamanna paasisinnaanngilaat, tassami Aningaasaqarnermut Aatsitassanullu Naalakkersuisup Andreas Uldumip Sermitsiami tallimanngormat saqqummersumi oqaatigaa, Aningaasanut Inatsisissap 2015-imoortup amerlanerpaanit isumaqatigiissuteqarfigineqarnissaa siunertaralugu partiit tamarmik februaarip aallartinnerani qaaqquniarlugit.

Aningaasaqarnermut Aatsitassanullu Naalakkersuisoq Andreas Uldum oqarpoq:

”Naalakkersuisut suliassaqarfitsik paasisaqarfigissallugu piffissaqartariaqarsimapput, suliniutillu soorlu Aningaasanut Inatsisissap suliarinera aallartisartariaqarsimallugit. Taamaammanuna Naalakkersuisunngortut ulluni 100-ni siullerni eqqissisimatinneqartarnerat ileqquusoq. Partiit suleqatiginissaat qilanaarivarput, tassami innuttaasunut, inuiaqatigiinnut inuussutissarsiortunullu iluaqutaasumik aningaasaqarneq pillugu politikkimik qularnaariniarluta amerlanerpaanik isumaqatigiissuteqarnissarput kissaatigaarput.

Uggornarpoq IA-p aggersaanerput siulleq tusarsimanngimmassuk, taamalu danskit tusagassiorfii aqqutigalugit suleqatikkuminaannerarluta isornartorsiortariaqalerluta. Kingunilimmik oqaloqatiginnikkusussuseqarpugut, Sara Olsvigimullu innersuussutigissavara illuatungiliuttuni partiit annersaasa Naalakkersuisullu suleqatigiilluarsinnaanissaanut siuarsaaqataaqqullugu. Tassami suleqatigiinneq ataqqeqatigiinnerlu tamanut atuuppoq, Naalakkersuisuinnarnuunngitsoq. Ukiuni tulliuttuni Aningaasanut Inatsisissat pillugit IA partiillu allat suleqatiginissaannut qilanaarpunga, isumatusaartumimmi piffissarlu ungasinnerusoq eqqarsaatigalugu politikkikkut aalajangiisoqarnissaa nunatta pisariaqartippaa. Innuttaasut suliffeqarfiillu naatsorsuutigaat tamatsinnut tamatta akisussaaffimmik tigusissasugut.

 

Paasisaqarnerorusuttut attavigisinnaavaat Naalakkersuisumut allatsi Ejner Grønvold, oqarasuaat +299 34 52 12 eller e-mail ejner@nanoq.gl.