Oqaatigineqartut nalilersuiffigineqassapput

Karl-Kristian Kruse avannaaneereerluni: Oqaatigineqartut nalilersuiffigineqassapput.

Aalisarnermut, Piniarnermut Nunalerinermullu Naalakkersuisoq, Karl-Kristian Kruse, Naalakkersuisuni ilaasortatut siullerpaamik angalaaqqammerpoq, avannaani illoqarfiit Ilulissat, Uummannaq aamma Upernavik tikeraarlugit.

Tikitamini innuttaasunut soqutiginnittunut ataatsimiititsisarpoq, aalisarneq qulequtarineqartarluni. Ataatsimiinnerit aalisartorpassuarnit najuuffigineqartarput.

Uummannami aamma Upernavimmi Royal Greenlandip fabrikkiinut aamma pulaarpoq, Ilulissanilu Halibut Greenlandip siulersuisui ataatsimeeqatigalugit.

Angalaarnermini Naalakkersuisooqatigiit isumaqatigiissutaasa siunertaannik nassuiaassinissaq pingaartinnerpaava, aalisartunik qaleralinniartarneq pillugu aamma oqaloqatiginninnerulluni, aalisartunillu aamma qanimut oqaloqateqarnissaq pingaartillugu.

- Illoqarfiit tikitakka qaleralinniarfiummata Naalakkersuisooqatigiinnissamut isumaqatigiissummi ilaatigut allassimasut, tassaasut nunatta avannaani sikusartumi qaammatini siullerni pingasuni pisassiissutit avataatigut immikkut qaleralittassiisoqartarnissaa aamma  piniarsinnaanermut allagartat aalisarsinnaanermullu akuersissutit kommuninit isumagineqartalernissaat saqqummiuppakka. Aamma pingaartillugu oqaatigivara aalisakkat sapinngisamik annertunerpaamik nunatsinni nalituunngorteqqaarlugit tunisassiarineqartarnissaat, Aalisarnermut, Piniarnermut Nunalerinermullu Naalakkersuisoq, Karl-Kristian Kruse oqarpoq.

Naalakkersuisut aqutsiveqarfiit Qeqertarsuup Tunua, Uummannap aamma Upernaviup killeqarfii septembarip 15-ianni 2014 allanngortippaat. Aqutsiveqarfinni killilinnik qaleralinniartoqarsinnaalerluni aammali pinngortitap piarfissiinera atorluarlugu  qaleralinniartoqarsinnaalluni.

- Ataatsimiinnermi najuuttut ilaatigut nassuiaateqarfigaakka aqutsiveqarfiit killeqarfiisa allannguutai pillugit, aamma sooq taama ittunik killeqartitsisoqalersimanersoq, Karl-Kristian Kruse oqarpoq.

Ataatsimiinnerni ilaatigut aamma oqaatigisai tassaapput umiatsiaaqqanut qaleralittassiisoqartassanersoq, aalisariutitut qaleralittassiisoqartassalluni, qassusersorluni qaleralinniartarneq, aamma aalisariutit qaleralinniarnerminni umiatsiaaqqanik atuisinnaaneri.

Karl-Kristian Kruse erseqqissaavoq aalisartunit oqaatigineqartut suliareqqiinissamut nalilersuutaajumaartut.

- Oqaatigineqartut aalisarneq pillugu inatsisip allanngortinneqarnissaanut,  pisariaqartinneqartut naapertorlugit, ilanngunniarneqarumaarput, Naalakkersuisuni ilaasortaq oqarpoq.

Naalakkersuisuni ilaasortap qilalukkanik qernertanik piniartarnermi pissutsit aamma nannunniartarneq aarrinillu piniartarneq oqaaseqarfigalugit.


Attavissaq: Naalakkersuisumut Allatsi, Judith Kûitse Nielsen, email: jukn@nanoq.gl