Ilisimasat pissarsiarisinnaasagut tamaasa atorfissaqartippagut

Ilisimatusarfimmi kandidatit ph.d-milu ilinniartut allaffissorneq, inuussutissarsiutit inuiaqatigiillu pillugit ilisimalikkaminnik ingerlatitseqqiisarnissaminnik siunissami pitsaanerusumik periarfissaqalernissaat Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisup qulakkeerniarpaa.

Innuttaasut ilinniartitaanerannut inuiaqatigiit aningaasarpassuit atortarpaat. Taamaammat ilinniartut soraarummeerutiminnik allaaserisaqarnerminnut ph.d-nngornermilu ilisimatuutut allaaserisaqarnerminnut atatillugu ilisimalikkaminnik ingerlatitseqqiisarnissaat pingaaruteqarpoq.

”Ilisimatusarfimmi ilinniartut ilisimasaasa pingaaruteqartut ingerlateqqinneqartannginnerat uggorisaqaara. Qularutiginngilara ilinniartut aamma taamatut misigisimasassasut. Suliaqarluarsimagaanni soorunami allanut ingerlateqqikkusunnartarput. Ilinniartut soraarummeerutiminnik allaaserisaqarnermi ph.d-inngornermilu ilisimatuutut allaaserisaqarnermi ilisimaligaat ajoraluartumik ullumikkut taamaallaat soraarummeernermut atorneqartarput, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Nivi Olsen nassuiaavoq, namminerlu misilittakkani tunngavigalugit nangilluni:

”Uanga nammineq Ilisimatusarfimmi ulloq 1. april 2014 kandidatinngorpunga. Ilisimasakka innuttaasunut ingerlateqqikkusukkakkit Sermitsiamut allagaqarpunga. Aviisi ullut naalakkersuisunngoreernerma kinguninngua tikillugu akissuteqanngisaannarpoq. Tamanna pakatsissutigingaatsiarpara, politikkeriunngikkaluarlungali ilisimasama ingerlateqqinnissaannut sunik periarfissaqarnerlunga ilisimanngilara.”

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisup ilinniartut imminermisut misigisaqannginnissaat maannakkut qulakkeerniarpaa.

”Ilinniartut tamarmik suliassaqarfinnut atasunik soraarummeerutiminnik allaaserisaqartut ph.d-miluunniit ilisimatuutut allaaserisaqartut ilisimassavaat ilisimasaminnik paasisaminnillu uannut atorfilittannullu saqqummiusserusussappata nuannaarutigingaassaginga, taamaalilluta ilisimasaat sulinitsinni atorsinnaaniassagatsigit.  Isumaqarpunga taamatut aaqqissuussineq kikkut tamat iluaqutigissagaat. Ilinniartut ilisimasaminnik ingerlatitseqqiissapput, naalakkersuisoqarfillu paasissutissanik pingaaruteqartunik pissarsissalluni.” Nivi Olsen oqarpoq nangillunilu:


”Ilisimasat ilisimatusarnermilu paasisat pisoqalivallaarsimannginnissaat qulakkeerniarlugu soraarummeernermut allaaserisat ilisimatuutullu allaaserisat annerpaamik ukiunik pingasunik pisoqaassuseqarnissaat kissaatigaara. Taamaammat arlaat pingaaruteqartunik ilisimasaqarpat ingerlateqqikkusullugillu soraarummeernerminni anguseqqammersimanersut imaluunnit ukiut marluk qaangiuttut ilinniarnerminnik naammassinnissimanersut apeqqutaatinnagu tusarfigerusoqaakka.”

Naalakkersuisoqatini, inuussutissarsiortut kattuffiillu ilinniartunut taamatut neqerooruteqarnissaannik kaammattorpai.

”Nunatsinni inuit 56.000-iinnaavugut, tamannaannarlu tungavigalugu ilisimasatta assi-giinngitsunut ingerlateqqittarnissaat pingaaruteqartorujussuuvoq. Isumaqarpunga aallarniiniminnguara aallarniutissaqqissuusoq,” Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq naggasiivoq.

 

 

 

 

Paasisaqarnerorusukkaanni attavigineqarsinnaavoq Naalakkersuisumut allatsi Jens-Frederik Nielsen, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik; Toqq/direkte 345702

jfni@nanoq.gl