Malinnaatitaasut ataatsimiinnerat angusaqarfiulluartoq

Saammaateqatigiinnissamut Isumalioqatigiissitap aamma malinnaatitaasut ataatsimiinnerat angusaqarfiulluartoq

Saammaateqatigiinnissamut isumalioqatigiissitaq Nuummi ataatsimiinnerminnik naammassinermik kingorna marlunngornermi malinnaatitaasunik siullermeerlutik ataatsimeeqateqarput. Malinnaatitaasut inuttaligaapput Inatsisartuni partiit ilaasortaatitaqartut toqqartugaannik taakkua isumalioqatigiissitap sulineranik malinnaassapput inuiaqatigiinnut ilisimasanik avitseqatigiinneq aamma oqallinneq peqataaffigissallugit.

Partiit ataasiakkaat sinniisorititaat tassaapput Mikael Petersen (S), Sara Olsvig sinnerlugu peqataasoq Juliane Henningsen (IA), Hanne Rasmussen (D), Ove Frank Heilmann (A) aamma Per Rosing-Petersen (PN).

Ataatsimiinnermi Saammaateqatigiinnissamut isumalioqatigiissitamit anguniakkat aamma suleriaasissatut siunniussaq malittarinnittunut saqqummiunneqarpoq, isumalioqatigiissitap suleriaqqinnissaanut malinnaatitaasunit isummersuutit siunnersuutillu pitsaasut arlallit saqqummiunneqarlutik.

”Politikkikkut qinikkanik suliamik malinnaatitaasunik ataatsimeeqateqarneq angusaqarfiulluarpoq. Isumalioqatigiissitap ataatsimut isummiussaat saqqummiuppavut aamma 2017-ip naanissaanut siunnerfittut pilersaarusiatsinnik saqqummiussivugut isumalioqatigiissitap suliassamik ingerlatsinissaanut tunngaviusussamik, isumalioqatigiissitap suliassaani allassimasoq naapertorlugu. Partiit sinniisaat tamarmik isummersuutinik siunnersuutinillu saqqummiussipput suliamik ingerlatseqqinnitsinni qularnanngitsumik iluaqutaallutik kinguneqartitsilluartussanik.

Malinnaatitaasunit annermik oqaloqatigiinnissaq peqataatinneqarnerlu kissaatigineqarput aamma taakkunannga isumalioqatigiissitap suliamik ingerlatsineranut soqutiginninneq ilisimasaminnillu avitseqateqarumaneq erserpoq. Uagutsinnut malinnaatitaasunik ataatsimeeqateqarneq assut qiimmaallannarpoq Nunatsinni saammaateqatigiinnissamik suliniutit pillugit siunnersuutaat aamma tusassallugit.”  Aviâja Egede Lynge Isumalioqatigiissitaq sinnerlugu oqarpoq.

Isumalioqatigiissitap ukiumut marloriarluni malinnaatitaasut ataatsimeeqatigisassavai isumalioqatigiissitap suliamik ingerlatsinermini killiffimminik ilisimatitsisarnerata saniatigut.  Malinnaatitaasut peqatigalugit ataatsimiinnissaq tulleq naatsorsuutigineqarpoq 2015 Nuummi aggustimi ingerlanneqarnissaa.

 

Attavissaq:

Mari Kleist

Allaffimmi pisortaq

Saammaateqatigiinnissaq pillugu Isumalioqatigiissitaq

email: marh@nanoq.gl