Pituffimmi Sakkutooqarfik pillugu ullumi allaaserisaq pillugu Sermitsiaq.AG-imut naqqiut

Sermitsiaq.ag-p nittartagaani ullumi Pituffimmi Sakkutooqarfimmi kiffartuussinissamut isumaqatigiissut pillugu allaaserisami qulequtaqartumi ”USA-p Danmarkillu naalakkersuisuisa Kalaallit Nunaat sumiginnarpaat”, Inussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq kukkusumik issuarneqarpoq. Naalakkersuisup Vittus Qujaukitsup allaaserisami oqarsimaneragaalluni issuarneqarnini ilisarisinnaanngilaa. 

Vittus Qujaukitsoq ullumi Folketing-imi apeqquteqaat aallaavigalugu oqallinnerup kingunitsianngua Sermitsiamut oqarpoq, Danmarki aamma Kalaallit Nunaat suliami tassani qanimut suleqatigiittut, aammalu Danmarkip aamma Kalaallit Nunaata akornanni isummat assigiinngissuteqarsimasinnaanerat Naalakkersuisut aamma danskit naalakkersuisuisa akornanni isumagineqartut. 

Vittus Qujaukitsoq tamatumunnga malitseqartitsilluni oqarpoq: 

”Suliami matumani Naalakkersuisut aamma illuatungiliuttut akornanni assigiinngissutaasoq tassaavoq, Naalakkersuisut pilersitsiviulluartumik siunissamullu aaqqiinissaq eqqarsaatigalugu danskit naalakkersuisuinik suleqateqarnerat, aamma neqeroortitsinerup inernerata  31. oktober 2014 nalunaarutigineqareernerata kingorna.” 

Vittus Qujaukitsoq nangippoq: 

”Naalakkersuisut isumaqarput isumaqatigiissummut neqeroortitsinerup inerneqarnerata kingorna, USA-mut taarsiissuteqarnissaq pillugu piumasaqaateqartoqartariaqartoq. Nunaqavissunut suliffissat, ilinniartunut sungiusarfissat aamma akileraarutitigut isertitassaq qulakkeerniarlugit, danskit aamma kalaallit naalakkersuisui suli annertuumik suliassaqarput, aamma ullumi oqallinnerup kingorna.”   

Paasissutissanik annertunerusunik piniarnermi attaveqarfissaq: Naalakkersuisup allattaa Kirsten Enequist, oqarasuaat 34 50 00.