Saammaateqatigiinnissamut Isumalioqatigiissitaq ilisarnaateqalerpoq

Saammaateqatigiinnissamut Isumalioqatigiissitaq namminerisaminik ilisarnaatitaassaaq nittartagartaarlunilu.

Saammaateqatigiinnissamut Isumalioqatigiissitap 2014-imi ukiakkut ilisarnaatissap ilusissaa unammisitsissutigaa, taanna siunissami takussutissatut ilisarnaatigissammagu. Maannakkut isumalioqatigiissitap kusanartunik siunnersuutinik tigusaqartup ajugaasoq toqqarpaa. Ilisarnaammut akissarsisinneqarpoq titartaasartoq Malene Kuitse Christensen Nuummeersoq.

Ilisarnaat isumalioqatigiissitamut pisortatigoortumik tunniunneqarpoq Nuummi ileqquusumik ataatsimiinnerata naammassineqarnerani , tassa akissarsiassaq tunniunneqarmat marlunngornermi 20. januar 2015 Katuap ataatsimiittarfiani nalliuttorsiualaarnermi.

”ilisarnaammiipput naqinnerit “s” aamma “I” assiliartaani ataatsimoortut. Naqinnerup “s”-ip uummat pilersippaa naqinnerullu “I”-p inuk eqitsiniarluni isaassisimasoq takutillugu. Assiliap taamaalilluni inuit saammaateqatigiittarnerat ilisarnaaserpaa.” Unamminermi ajugaasoq Malene Kuitse Christensen oqarpoq.

Saammaateqatigiinnissamut Isumalioqatigiissitap ilisarnaatitaava Isumalioqatigiissitap atortuinut assigiinngitsunut atorneqassaaq minnerunngitsumillu nittartagaanut februarip aallartinnerani atorneqalersussamut.

“Malene ilisarnaammik ilusiliisimavoq isumalioqatigiissitap sunertaanut naleqquttumik. Ilisarnaat ilusiligaavoq kusanartumik takussutissartaqarluartumik inuit akornanni saammaateqatigiinnermut takussutissaasumik assigiinngissutsinullu inissaqartitsisumik. Tamakku saniatigut naqinnerit “s” “I”-lu Saammaateqatigiinnissamut Isumalioqatigiissitap naalisarneranut takussutissaapput. Malene pilluaqqungaarparput.” Aviâja Egede Lynge isumalioqatigiissitaq sinnerlugu oqarpoq.