Sermitsiami Politikenimilu IA-p allaaserisaa pillugu erseqqissaassut

Tallimanngornermi 16. januar Sermitsiami aamma Politikenimi 18. januar Sara Olsvig aamma Johan Lund Olsen IA-meersut Pituffimmi isumaqatigiissutip atorunnaarnera pillugu allaatigisaqarput.

Allaatigisani marluusuni tamani danskit naalakkersuisuinut Naalakkersuisuusimasullu suliamik suliarinninnerannut tunngatillugu arlalinnik isornartorsiuisoqarpoq.

Allaatigisanut marluusunut tamanut tunngatillugu matumani Naalakkersuisunit erseqqissarneqartariaqaannarpoq Naalakkersuisut suliami tassani "malunnartumik nipangersimanerannik", kiisalu IA-p siulittaasuata 19. december 2014-imi apeqquteqarsimaneranik "Naalakkersuisut suli akinissaminnut piffissaqarfigisimanngisaannik" Sara Olsvigip aamma Johan Lund Olsenip oqarnerat eqqunngimmat.

Ilisimatitsissutigineqarsinnaavoq Naalakkersuisut suliami tassani Sara Olsvigimit, Nunanut Allanut Sillimaniarnermullu Ataatsimiititaliamit, kiisalu Aningaasaqarnermut Akileraartarnermullu Ataatsimiititaliamit arlalinnik apeqquteqarfigineqarsimammata tamarmik akineqartunik.

Sara Olsvigip apeqqutaa 19. december 2014-imeersoq allaatigisani innersuussutigineqartoq ataasinngornermi 12. januar 2015-imi akineqarpoq.

Suliap taassuma ilungersunartorujussuup danskit naalakkersuisui qanimut suleqatigalugit aamma siunissami Naalakkersuisut pingaartinnialersaarpaat, Nunatta soqutigisaasa pitsaanerpaamik isumagineqarnissaat qularnaarniarlugu.

Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq Pituffimmi isumaqatigiissutip atorunnaarnera pillugu pingasunngornermi 21. januar Christiansborgimi Martin Lidegaardimik apeqquteqaat aallaavigalugu oqallinnermi aamma peqataassaaq.

Folketingimi apeqquteqaat aallaavigalugu oqallinnermut atatillugu Vittus Qujaukitsup Martin Lidegaard oqallinnertaa sioqqullugu ataatsimeeqatigissavaa. Aammattaaq Vittus Qujaukitsup Issittumut Amerikamit aallartitatut toqqagaaqqammersoq Admiral Robert J. Papp Københavnimi ataatsimeeqatigissavaa.

Sisamanngornermi Nunanut Allanut Sillimaniarnermullu Ataatsimiititaliaannik ataatsimeeqateqarnermi isumaqatigiissutip atorunnaarnera pillugu piffissami tulliuttumi ataatsimiititaliap qanimut ilisimatinneqartarnissaa Vittus Qujaukitsup kissaatigaa, taamaattumillu februaarip qaammataata ingerlanerani ataatsimiititaliap ilisimateqqinneqarnissaanut suliniuteqarniarluni, tamatumani Amerikami eqqartuussisunut qulliunerusunut ingerlatitseqqittarfiup GAO-p suliarinnittussarsiuussineq pillugu naammagittaalliuutigineqartoq pillugu oqaaseqarnissaa naatsorsuutigineqarpoq.