Nakorsiartarfiup mattoqqasarnissaa

Dronning Ingridip Peqqissaaviata nakorsiar-tarfiata tallimanngornerni matoqasalerallar-nissaa tallimanngorpat aallartissaaq

Tallimanngornerni tulliuttuni arfineq marlunni Dronning Ingrid-ip Peqqissaaviata nakorsiartarfia innuttaasunut saaffiginniffiusinnaassanngilaq oqarasuaatikkullu nalinginnaasumik nakorsamut attaveqarfiusinnaassanani.
Sap. ak. naanerini periarfissaasartut assigisaannik saaffiginnittoqarsinnaavoq.

Nunarput tamakkerlugu peqqinnissaqarfimmi atuutilersussamik, napparsimasut pillugit qarasaasiakkut nalunaarsuissummik atuutilersitsineq, matoqqatitsigallarnernut patsisaavoq. Dronning Ingridip Napparsimmavissuani iluatilluartumik atuutilersitsereernerup kingorna tullinnguuppoq Dronning Ingridip Peqqissaaviani atuutilersitsinissaq.

Atuutilersitsiniarneq suliassaavoq annertooq sulisunillu peqataaffigineqarnissaa pisariaqarluni. Innuttaasut annikinnerpaamik sunnerneqarnissaat anguniarlugu sap. ak. naanerini sulisunik ilinniartitsinerit ingerlanneqassapput. Ajoraluartumilli ulluinnaat ilanngunneqarnissaat allaqqunneqarsinnaasimanngimmat, Dronning Ingridip Peqqissaaviani oqarasuaatikkut nakorsamik oqaluussisarneq sulisunullu saaffiginnissinnaaneq tallimanngornerni arfineq marlunni ukunani periarfissaassanngilaq:

  • Tallimanngorneq januaarip ulluisa 24-anni 2015
  • Tallimanngorneq januaarip ulluisa 30-anni 2015
  • Tallimanngorneq februaarip ulluisa arfernanni 2015
  • Tallimanngorneq februaarip ulluisa 13-anni 2015
  • Tallimanngorneq februaarip ulluisa 20-anni 2015
  • Tallimanngorneq februaarip ulluisa 27-anni 2015
  • Tallimanngorneq marsip ulluisa arfernanni 2015

Tallimanngornerni matoqqaviusuni innuttaasut qanoq periarfissinneqarpat?

  • Tallimanngornerni pineqartuni sap. ak. naanerini periarfissat assigalugit 34 44 00 –imut sianernikkut nakorsamut attaveqarniat saaffiginnissinnaapput.
  • Ajutoortut nappaammilluunniit inuunerminnik navianartorsiortut, pisarnertut ambulance-mut 344 112 sianissapput/siarnutigineqassapput
  • Meeraaqqerisunut angerlarsimaffinnilu peqqissaasunut attaveqarsinnaanerit allannguuteqassanngillat.
  • Inuunerissaaviit tupatorunnaanissamullu siunnersuisartut, tallimanngornerni pineqartuni attavigineqarsinnaassanngillat.
  • Qarasaasiakkut nakorsamut attaveqarfissaq www.doktor.gl atorneqarsinnaavoq akissutisinissarli ullut sisamat pallillugit utaqqisariaqarsinnaassaaq.
  • Nunatta Nakorsaataasivia Dronning Ingridip Peqqissaaviata ilaaniittoq matoqqatitsinissamik pilersaarummut ilaanngilaq.

Nunatta Nakorsaataasivia pisarnertut tallimanngornerni nal. 9.30-imiit 15.30-ip tungaanut ammasassaaq.

Annikitsumik pilliuteqarnikkut angusassaq annertooq
Peqqissutsimut Pitsaaliuinermullu Aqutsisoqarfiup pisortaa Jóanis Erik Køtlum ima oqaaseqaateqarpoq:
-Piffissaq qaninneq eqqarsaatigalugu tallimanngornerit tulleriit arfineq marluk Dronning Ingridip Peqqissaavianut nalinginnaasumik nakorsiartitsinngikkallassaagut.
Tamannali piffissaq ungasinnerusoq isigalugu iliuusaavoq annikitsoq. Qarasaasiakkut nalunaarsuissut sumiikkaluaraanniluunniit nalunaarsukkat pissarsiarineqarsinnaalernissaat pissutigalugu, innuttaasunut toqqissinarneruvoq. Sulisut napparsimasut pillugit qarasaasiakkut nalunaarsuiffittaarnikkut, ataatsimoorussamik napparsimasut nakorsartinnerminnut atatillugu aqqusaartugaannik pitsannguisussamik, qarasaasiakkut sullississutitaassapput.

Nunatsinni Peqqinnissaqarfimmi napparsimasut pillugit nalunaarsuiffik

  • Napparsimasut pillugit qarasaasiakkut nalunaarsuiffik politikkikkut aalajangigaavoq. Nalunaarsuissut novembarip ulluisa 18-anni 2014 Nuummi Dronning Ingridip Napparsimmavissuani atuutilerpoq.
  • Sinerissami peqqinnissaqarfiup immikkoortuini atuutilersitsinissaq Dronning Ingridip Peqqissaaviani aallarnerneqassaaq.
  • Suliniummik ingerlatsineq manna tikillugu pilersaarutit malillugit ingerlanneqarmat, nunarput tamakkerlugu atuutilersitsiniarnerup 2016-ip naannginnerani naammassinissaa naatsorsuutigineqarpoq.

Paasissutissanik sukumiinerusunik pissarsiniat attavissaat:

Aqutsisoqarfiup pisortaa Jóanis Erik Køtlum: jek@peqqik.gl