Pituffik: Naalakkersuisut kiffartuussinissamik isumaqatigiissut maangaannartinngilaat

Pituffimmi sakkutooqarfiup kiffartuunneqarnissaanut suliarinnittussarsiorneq pillugu Naalakkersuisut siulittaasuannik Kim Kielsenimik aamma Inuussutissarsiornermut, Sulisoqarnermut, Niuernermut aamma Nunanut allanut Naalakkersuisumik Vittus Qujaukitsumik Inatsisartut Nunanut Allanut Sillimaniarnermullu Ataatsimiititaliaata ippassaq isumasioqatigiinnissamik qaaqqusinerata malitsigisaanik IA tusagassiorfinnut nalunaarummi inerniliivoq Naalakkersuisut kiffartuussinissamik isumaqatigiissut maangaannartissimagaat.

USA suliarinnittussarsiuinerup oktobarip 31-anni naanerata kingorna ilisimatitsivoq Thule Air Base-imi kiffartuussinissamik suliarinnittussatut amerikamiunit pigineqartoq Exelis Services toqqarsimallugu, tamannalu ingerlariaasiusimasoq pillugu IA-p avammut saqqummiullugu naliliineranut inerniliineranullu tunngaveqanngivissoq Naalakkersuisut erseqqissaatigaat.

Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq oqarpoq:

”IA suliami tassani pissusiviusunik ilisimannikkaluarluni akerlianik oqaaseqarpoq. Naalakkersuisut qinersinerup kingornatigut decembarimi inissitsitertut pingaarnerpaatut amerikamiut nalunaarutigisaat malitseqartippaat. Taamaammanuna suliaq danskit ministeriunerannut nunanullu allanut ministeriannut sapaatit akunnerata matuma siuliani saqqummiunneqartoq, taamaalilluni Danmark Kalaallit Nunaallu ataatsimoorlutik amerikamiut oqartussaasuinut suliamut tunngatillugu tamakkiisumik apuussisinnaaqqullugit. Tamatuma kingorna, suliaq pillugu Danmarkimi nunanut allanut ministeri isumasioriarlugu, suliaq Amerikamiut Danmarkimut aallartitaalu  oqaloqatigiissutigaarput.

Danskit kalaallillu naalakkersuisuisa taamatuttaarlumi suliffeqarfiit allat USA-p aalajangiineranik naammagittaalliuuteqartut akornanni ataatsimut paaseqatigiittoqarpoq, tassa USA-p suliariumannittussarsiuussinermi inerniliinera suliariumannittussarsiuussisarnermut malittarisassanut naapertuutinngitsoq.  Tamanna amerikamiut naammagittaalliuuteqartarfianni maannakkut suliarineqarpoq. Naammagittaalliuuteqartarfik  amerikamiut sakkutuuisa suliariumannittussarsiuussisarfiattulli amerikami oqartussaaffiuvoq.

Taamaammat Naalakkersuisut kiffartuussinissamik isumaqatigiissummik maangaannartitsisimaneraaneq piviusorsiortuunngilaq aamma Kalaallit Nunaata Danmark qanittumik suleqatigalugu suliami tassani USA-mut Kalaallit Nunaata soqutigisai suliariniarlugit aqqusaarsimasaanut tunngatillugu ingerlasimanermut tunngatillugu eqqarsaatigilluagaanani.”

Naalakkersuisut siulittaasuat Kim Kielsen oqaaseqarpoq:

”Naalakkersuisut Inatsisartuni illuatungiliuttut qanittumik suleqatigineqarnissaat pingaartitaraat - aamma suliami tassani - kisianni illuatungiliuttut suliassaminnut inerisimanissaat aamma pisariaqarpoq.

Naalakkersuisut suliamut tunngatillugu ataatsimoornissarput pingaartillugu kajumissaarutigaat. Nunanut allanut attaveqarnermi partiip tunuliaqutigisap tunuartinneqartariaqarnera pingaaruteqarluinnarpoq. Nunanut allanut tunngatillugu Kalaallit Nunaata angusaqarnissaanut suleqatigiittariaqarpugut, akilersinnaanngilarlugu IA Inatsisartut ataatsimiititaliaani ukiuni sisamani tulliuttuni oqaloqatigiinnissamut piumassuseqanngippat.

Kalaallit Nunaannut pitsaanerpaaq anguniarlugu suleqateqarusuppugut.