Aalisarnermut siunnersuisooqatigiit siulittaasortaarput

Bent Sørensen aalisarnermut siunnersuisooqatigiinni siulittaasuulerpoq.

Aalisarnermut siunnersuisooqatigiit ullumi ukioq manna ataatsimeeqqaarnerminni isumaqatigiissutigaat Kalaallit Nunaanni sulisitsisut peqatigiiffianni siunnersorti, Bent Sørensen, siunnersuisooqatigiinni 2015-imi siulittaasuussasoq.

Aalisarnermut siunnersuisooqatigiit malittarisassaat naapertorlugit ukiumi nutaami ataatsimeeqqaarfiusumi siulittaasussamik nutaamik tullissaanillu qinersisoqartarpoq.

Kalaallit Nunaanni Sulisitsisut Peqatigiiffiat, GA, KNAPK-lu paarlakaallutik siulittaasuutitaqartarput.

Aalisarnermut siunnersuisooqatigiit ullumi, januaarip 15-ianni ataatsimeeqqaarput.

Aalisarnermut siunnersuisooqatigiit aalisarnermik soqutigisaqaqatigiinnit ilaasortaaffigineqartoq Naalakkersuisunut aalisarnermut tunngasunik siunnersuisarput.

Petrus Biilmann, KNAPK-ip pisortaa siunnersuisoqatigiinni 2014-imi siulittaasuusoq siunnersuisooqatigiinni siulittaasumut tulliulerpoq.

 

Aajuna attavissaq:
Immikkoortortaqarfimmi Pisortaq Emanuel Rosing, email:emanuel@nanoq.gl