Jameson Landimi aatsitassarsiorusuttut qinnuteqarput

’Matu ammaassisoq’ suleriaaseq aqqutigalugu Jameson Land-imi ikummatissiassanik misissuinissamut qalluinissamullu akuersissutinik qinnuteqaatit arlallit.

Tunumi Jameson Land-imi ikummatissiassanik misissuinissamut qalluinissamullu akuersissutinik qinnuteqartoqarsinnaaneranut, 2014-imi ukiaanerani Naalakkersuisut periarfissiipput. Piffissami 2014-imi 1. septembarimiit 28. novembarimut Aatsitassanut oqartussaasup ingerlatseqatigiiffinnit imminnut attuumassuteqanngitsunit marlunnit qinnuteqaatit tiguai. Ingerlatseqatigiiffiit marluusut tamarmik sumiiffinnit neqeroorutigineqartunit pingasuusunit marlunnut akuersissummik qinnuteqarput, taamaattumillu qinnuteqaatit unammilleqatigiittut tassani pineqarlutik.

Aatsitassanut oqartussaasup qinnuteqaatit marluk taakkua maannakkut nalilersuleruttorpai. Qinnuteqaatit tunngavissarititaasut arlalippassuit aallaavigalugit nalilersorneqassapput. Ilaatigut qinnuteqartut ikummatissiassanik misissuinermut qalluinermullu siusinnerusukkut misilittagaat, sumiiffinnit assigusumik atugaqarfiusunit taakkua misilittagaat, aningaasaqarnikkut piginnaassuseqarnerat aammalu qinnuteqartut suliassanik suliarinninnermi qanoq iliornissamik siunertaqarnersut isiginiarneqassapput. Qinnuteqartut peqqinnissamut, isumannaallisaanermut avatangiisinullu tunngatillugu piginnaasaqarnerat misilittagaqarnerallu aamma isiginiarneqassapput.

Jameson Land-imi sumiiffinnut pingasunut taakkununnga tunngatillugu qinnuteqaatinik nassiussinissamut ingerlatseqatigiiffiit allat suli periarfissaqarput. Suliffeqarfinnut maannakkorpiaq qinnuteqaateqarsimasunut marluusunut taakkununnga pisinnaatitaaffinnik tunniussinnginnissamik Naalakkersuisut aalajangissappata, qinnuteqartut nutaat sumiiffinnut neqeroorutigineqartunut taakkununnga nalilersuinermi ilaatinneqarsinnaassapput. Qinnuteqaatit nutaat tiguneqarnerisa tulleriinneri malillugit suliarineqassapput.

Paasissutissat erseqqinnerusut aamma neqeroortitsinermut najoqqutassat nassaarineqarsinnaapput uani www.govmin.gl.

 

Paasissutissanik annertunerusunik piniarnermi attaveqarfissat:

Aatsitassanut Ikummatissanullu Naalakkersuisoq, Andreas Uldum: Tlf.nr.:+299 345 212

Naalakkersuisoqarfimmi pisortaagallartoq Jørgen T. Hammeken-Holm: Tlf.nr.: +299 346 846