Danmakimi suleqatinik naapitsineq

Vittus Qujaukitsup Danmarkimi suleqatini naapippai

Inuussutissarsiornermut, Suliffeqarnermut, Niuernermut Nunanullu Allanut Naalakkersuisutut angalanermini siullermi Vittus Qujaukitsoq sapaatip akunnerani qaangiuttumi Danmarkimi suleqatiminik arlalinnik ataatsimeeqateqarpoq.

Inuussutissarsiornermut, Suliffeqarnermut, Niuernermut Nunanullu Allanut Naalakkersuisup suliassaqarfimmi Naalakkersuisutut nutaatut nunanut allanut illersornissamullu suliassaqarfinnut ministerit akisussaasuusut naapeqatigai.

Nunanut allanut ministerip Martin Lidegaard-ip ataatsimeeqatiginerani Pituffimmi Sakkutooqarfimmi isumaqatigiissummut neqeroortitsineq qaqinneqarpoq, aammalu sukumiisumik oqallisigineqarluni. Nunanut allanut ministeri Folketing-imi ulloq 21. januar apeqquteqaat aallaavigalugu oqallinnissamut qaaqquneqarpoq, taannalu aamma ataatsimiinnermi oqallisigineqarpoq. Tamatuma saniatigut nunanut allanut suliassaqarfimmi siunissami Kalaallit Nunaanni naalakkersuisunngortut suleqatiginerisa ataatsimut isigalugu qanoq aaqqissuunneqarnissaa oqallisigineqarpoq. Vittus Qujaukitsup aamma USA-miit ambassadøri Pituffimmi Sakkutooqarfimmi isumaqatigiissutip neqeroortitsivigineqarnera pillugu ataatsimeeqatigaa.

Illersornissamut ministerip Nicolai Wammen-ip ataatsimeeqatiginerani, maannamut danskit-kalaallit Issittumi illersornissamut suliassanik suliarinninnermik misissuisarnermik ataatsimoorlutik suliaqarnerat oqallisigineqarpoq, tassani maannakkut 2015-imi ukiup affaani siullermi ataatsimoorluni suliaqarnerup saqqummiunneqarnissaa siunnerfigineqarluni.

Ataatsimeeqateqaqattaarnerni aamma Inatsisinik atortitsinermut ministerimut Mette Frederiksen-imut pulaarneq ilaatinneqarpoq, tassani nunanit allamiunut suliassaqarfiup akisussaaffigilerlugu tiguneqarsinnaaneranut tunngatillugu suliap ingerlanissaa oqallisigineqarluni. Ministerit paasinarsisitsiniarnermi suliaqarnissaq pisariaqartoq aallartinneqassasoq isumaqatigiipput.

Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq tamatuma saniatigut suleqatigisartakkanit sinniisunik, aammalu Kalaallit Nunaanni inuussutissarsiornermut atugassarititaasunik ineriartortitsinermut suliaqartunik pingaaruteqartunik ataatsimeeqateqarpoq.

Ataatsimiinnerit pissanganartut ilaat Siuariartortitsinermut aningaasaateqarfimmik ataatsimeeqateqarnermi pivoq, tassani Kalaallit Nunaanni suliffeqarfiit aallarnisaasut tapersersornissaannut annertunerusumik taarsigassarsititsisarnissamut aammalu siuariartortitsinermut qularnaveeqqusiisarnissamut periarfissat oqallisigineqarlutik.

- Siuariartortitsinermut aningaasaateqarfiup Kalaallit Nunaanni suliffeqarfinnut siuariartortitsinermut qularnaveeqqusiisarnissamik neqerooruteqarnissaq pilersaarusiorpaa. Taamaattoqassappat aaqqissuussineq Kalaallit Nunaanni aningaaseriviit aqqutigalugit atuutsinneqalissaaq. Aaqqissuussaq inuussutissarsiornermik siuarsaanermut suliniutit allat peqatigalugit Kalaallit Nunaanni inuussutissarsiornermi ingerlatanik nutaanik ineriartortitsinissamut periarfissanik pitsanngorsaasinnaassaaq, oqarpoq Vittus Qujaukitsoq.

Inuussutissarsiornermut, Suliffeqarnermut, Niuernermut Nunanullu Allanut Naalakkersuisup aamma Ilulissani Kangiani tikeraartitsinermut sullissivimmik pilersitsinissaq pillugu suleqatigiissinnaaneq pillugu Realdaniap Aningaasaateqarfia ataatsimeeqatigaa. Tamatuma saniatigut aningaasaateqarfik Realdania Byg aqqutigalugu Ilimanami illut eqqissisimatitat marluk, Ilimanami takornariartitsisarnerup ineriartortinnissaanut ilaatinneqartussat, nutarterneqarnerannut tapersiisimavoq.

Suliniutit taakkua qujaruppakka, oqarpoq Vittus Qujaukitsoq, nangillunilu – suleqateqarnerit taamaattut tassarpiaapput takornariartitsisarnermut inuussutissarsiornerup ineriartorteqqinnissaanut Kalaallit Nunaanni pisariaqartinneqartut.

 

Annertunerusumik paasisaqarusunnermi attaveqarfissaq: Ministersekretær Kirsten Enequist,

tlf. 34 50 00.