Kangerlussuarmi napparsimasut atugarissaarnerulissapput

Maanna napparsimasut angalanerminni Kangerlussuarmi utaqqisarfeqalissapput. Peqqissutsimut pinaveersaartitsinermullu aqutsisoqarfik Mittarfeqarfiillu isumaqatigeeq­qammerput utaqqisarfimmik attartornissamut ulloq apriilip aallaqqaataani 2015 atuutilersussamik. Utaqqisarfik atorneqalissaaq annikitsumik allanngortinneqareerpat.

-” Siorna nunaqarfiit pillugit isumasioqatigiinnermi kommunefogedit  napparsimasut Kangerlussuarmi atugarisaat pillugit paasitissavaannga.

Nammineq misigisaqarfigaara kræfteqartoq, akunnernik tallimani nerisarfimmi inunnik ulikkaartumi utaqqinera, Kangerlussuarmi  napparsima­su­nut utaqqisarfeqannginnera peqqutigalugu. Tamanna tunngavigalugu siunniussimavara sulissutiginiarlugu Kangerlussuaq aqqusaarlugu napparsimasut atugaat pitsanngorsaavigineqassasut” tamanna aamma Naalakkersuisoqatigiit isumaqatigiissutaanni siunertat ilagaat oqarpoq Peqqissutsimut Nunat Avannarliit Suleqatigiinnerannullu Naalakkersuisoq Doris Jakobsen nangillunilu:

-”Assut naammagisimaarpara Naalakkersuisut maanna piviusunngortilereermassuk Naalakkersuisoqatigiit isumaqatigiissutaanni siunertaq Kangerlussuarmi napparsimasut utaqqisarfissaannik pilersitsiumallutik.   Upernaaq mannalu peqqinnissaqarfik napparsi­ma­sunut angalasunut pitsaanerusumik atugassaqalersitsissaaq, inip utaqqisarfiup nutaap   atulerneratigut. Qularinngilara innuttaaqatitta napparsimasut ilaqutaasalu assorsuaq iluaallaatigissagaat.”

Utaqqisarfik nutaaq angissuseqarpoq 44 m²-nik Kangerlussuarmi Peqqissaasoqarfiup eqqaani inissisimalluni.

 

Paasissutissanik ersarinnerusunik perusukkaanni aatavigineqarsinnaavoq pisortamut tullersortaagallartoq Leif Grønvold Jensen oqarasuaat +299 346616 imaluunniit e-mail legj@nanoq.gl