Aalisarnermi piniarnermilu nakkutilliineq eqaanneq

Karl-Kristian Kruse: Eqaannerusumik nakkutilliisoqartariaqalerpoq.

- Nakkutilliineq nutaamik aaqqissuussivigissallugu pilersaarutigaarput. Sumiiffinni unioqqutitsinerpaaffiusutut isigineqarsinnaasuni  taamaassorisaniluunniit annerusumik nakkutilliisalernissaq siunnerfigineqarluni.

Taama Aalisarnermut, Piniarnermut Nunalerinermullu Naalakkersuisoq, Karl-Kristian Kruse, aalisarnermut nakkutilliisunut, piniarnermut nakkutilliisunut, alaatsinaattunut nunnigussinermilu nakkutilliisunut, Nuummi ullumi ukiumoortumik sisamanngornerup tungaanut ataatsimiinnerini oqarpoq.

Aalisarnermut, Piniarnermut Nunalerinermullu Naalakkersuisup ullumi oqalugiaataani  pingaarnerpaaq tassaavoq nakkutilliinerup nutaamik aaqqissuuffiginiarneqarnera.

Ineriartortoqartuarmat pikkorissaqqittuartarnissaq pingaaruteqarpoq, misilittagaqartuunissarlu pingaaruteqarluni.

- Ilissi nakkutilliisarnissinni misilittakkassi tunngaviussapput,  nalunaarusiarisartakkasi tunngaviussallutik, aalisartut pisaminnik nalunaarutigisartagaat aamma tunngaviussallutik. Paasissutissat uppernarsineqartarput aamma malittarisassat qanoq katitigaatiginerini ersertarluni, taama Karl-Kristian Kruse oqarpoq, erseqqissaallunilu nakkutilliinerup nutaamik aaqqissuunneqarnissaa pitsaasumik ilinniarsimasuunissamik piumasaqaatitaqartoq, misilittagaqarluarnissamillu piumasaqaammik aamma nassataqartitsissalluni.

Ineriartortoqartuarmat pikkorissaqqittuartarnissaq pingaaruteqarpoq, aalisarneriinnaq inatsisiliornerillu kisimik ineriartunngimmata.

Nakkutilliinerup nutaamik aaqqissuunneqarnissaa piniarnermik nakkutilliisunut,  piniarnermut nakkutilliisunut alaatsinaatsunullu eqaannerusumik sulisalernissaannut,  suliassanullu suugaluartunut piareersimasuunissaannik piumasaqaateqassaaq.

- Eqaannerusuunissap ilaatigut imarivaa qanorluunniit illit atorfeqaraluaruit, soorlu piniarnermik nakkutilliisutut, aalisarnermik nakkutilliisutut alapernaarsuisutulluunniit sulisuuguit,  paasisitsiniaanermi ikiuunnissat naatsorsuutigissavat, imaluunniit piniarnermik aalisarnermillu nakkutilliineq, nunamulluunniit pisanik tulaassinermut aamma nakkutilleeqataanissat, Karl-Kristian Kruse oqarpoq.

Naalakkersuisuni ilaasortaq erseqqissaavoq ullormiit ullormut allanngortitsiniartoqanngimmat,  aaqqissugaanerli allanngortikkiartuaarneqassasoq suliassat pingaarnersiorneqartassallutik.

Karl-Kristian Kruse, ataatsimeeqataasunut 25-it missaanniittunut erseqqissaavoq

soraarsitsisoqassanngimmat, nalinginnaasumilli sulinermi allanngortitsiartuaarnissaq nakkutilliinermilu suliassat tulleriiaarneqarnerisa allannguutaannut piareersimaffigissagaat.

Atorfilinnut qunusaarisarneq, timmissat, miluumasut inatsisiliornerillu, tassaapput ukiumoortumik ataatsimeeqataasut oqaluuserisassaasa ilaat.