London Mining Greenlandimut tunuliaqusiisussat nutaat

London Mining Greenland A/S-imut tunuliaqusiisussat nutaat

Ingerlatseqatigiiffimmut London Mining Greenland A/S-imut aammalu ingerlatseqatigiiffiup Kalaallit Nunaata kitaani Isukasiani aatsitassarsiorfissamut pilersaarutaannut tunuliaqusiisussanik inissittoqarpoq.

Ingerlatseqatigiiffiup London Mining Greenland A/S-ip toqqaannanngitsumik tunniunneqarnissaa Naalakkersuisut ulloq 21. december 2014 akueraat. London Mining Greenland A/S, Kalaallit Nunaata kitaani Isukasiani saviminissarsiorfissamut piiaanissamut akuersissummik peqartup, ingerlatseqatigiiffik qullersaqarfiata taaguuteqartup London Mining Greenland (1) (Jersey) Limited, aktiaatai maannakkut ingerlatseqatigiiffimmut General Nice Development Limited tunniunneqarput.

Ingerlatseqatigiiffik nutaaq London Mining Greenland A/S-imut tunuliaqusiisussaq, General Nice Development Limited 1992-mi Hong Kongimi pilersinneqarpoq ilanngunneqarlunilu. Ingerlatseqatigiiffik Kinami Tianjinimit suliaqarnerminik ingerlatsivoq aammalu suliffeqarfimmut pingaarnernik pingasunik niuernermini ingerlatsiveqartumut qullersaqarfiulluni: aatsitassaqarfinnik ineriartortitsineq ingerlatsinerlu aamma aatsitassanik piiaaneq, nioqqutissanik suliarineqanngitsunik niuerutiginninneq aamma one-stop niuernernik taaneqartartunik kiffartuussinernik aamma niuernermik tunngaveqartumik pigisanik aalaakkaasunik inerisaaneq. Ingerlatseqatigiiffik nunani 80-init amerlanerusuni aamma Kinami, Singaporemi, Indonesiami, Indiami, Thailandimi, Tajikistanimi, Sydafrikami, USA-mi, Australiami aamma Ruslandimi nunap immikkoortuini 100-nit amerlanerusunik ingerlatseqatigiiffinnik immikkoortortaqarpoq. Ingerlatseqatigiiffiup iluani pigisat USD 10 mia. Sinnerlugit annertussuseqarput. Ukiumut kaaviiaartitat ukiuni kingullerni tallimani USD 18 mia.-init sinnerlugit amerlassuseqartarput. Nunarsuaq tamakkerlugu sulisut Globalt (General Nice Group-imi) ca. 12.000-it missaannik amerlassuseqarput.

Suliffeqarfinnik kattussinerit pisiarinninnerillu aamma inerisaasuarneq aqqutigalugit sisannik atortussanik pilersuinermi siuttunngornissaq ingerlatseqatigiiffiup siunertaraa. Pisortat aatsitassarsiornermik ingerlatsinerup, niuernerup aamma aningaasalersuisarnerup iluanni nukittuunik piginnaasaqarput. Siulittaasup Cai Suixinip oqaatigaa, ingerlatseqatigiiffik aatsitassarsiorfiit sumiiffiini suliassanilu annertuumik periarfissaqarfiusuni aningaasaliiniartoq. Ingerlatseqatigiiffiup Isuani suliassap suliarineqarnera nangeqqinniarpaa peqatigisaanillu nunap immikkoortuani avannarpasinnerusumi periarfissanik allanik misissuiniarluni.

Tunniussinermut immikkut attuumassuteqartuni General Nice Development Limitedip ingerlatseqatigiiffiit makkua pigisarai: IRC Limited, Ruslandimi saviminissamik saffiugassamik suliniutinik inerisaasoq, Pluton Resources, Australiap kitaani saviminissarsiorfimmi suliaqartuusoq aamma Palabora Mining Company, Sydafrikami saviminissamik tunisassiornertalimmik kanngussassiorfimmi suliaqartuusoq.

Naalakkersuisut naliliipput suliffissuaq aningaasalersuutissanik pisariaqartunik pissarsinissamut periarfissaqartoq, ilanngullugit Kalaallit Nunaata kitaani Isukasiani piiaanissamut akuersissutip ineriartorteqqinneqarnissaanut nammineq aningaasaatinut aningaasalersuineq, aningaasassarsinissaq aamma avataaniit taarsigassarsilluni aningaasalersuinissaq. 

Toqqaannanngitsumik tunniussinermik oqarneq isumaqarpoq London Mining Greenland A/S-imut tunngatillugu ilusiliineq allannguuteqassanngitsoq, ingerlatseqatigiiffilli tunuliaqutaasussaq maannakkut tassaasoq General Nice Development Limited. London Mining Plc 2014-imi siusinnerusukkut akiliisarnerminik unitsitsisoq maannakkut piginnittuujunnaavippoq.

London Mining Plc.-imi aningaasaqarnikkut ajornartorsiutit, ingerlatseqatigiiffiup maannakkut piiaanissamut akuersissummik General Nice Development Limitedimut tunniussineranik malitseqartut, ingerlaannaq ingerlatseqatigiiffimmut immikkoortortaqarfiusumut London Mining Greenland A/S-imut sunniissanngillat

Tunniussinermi ilisimatitsissutigineqarpoq London Mining Greenland A/S-ip taaguutini taaguutigiinnassagaa aammalu Nuummi qullersaqarfeqaannassasoq, aammalu maannakkut sulisuusut sulisoriinnarneqarnissaat kissaatigineqartoq.

London Mining Greenland A/S Kalaallit Nunaata kitaani Isukasiani nunap qaavani aatsitassarsiorfimmik sananissamik pilersaaruteqarpoq, ukiuni 3,5-ini sanaartorneq ingerlassalluni aammalu maannamuugallartoq ukiuni 15-ini aatsitassarsiorfimmik ingerlatsinissaq naatsorsuutigineqarluni. Aatsitassarsiorfippiaap saniatigut aqqusineq 105 km missaanni takissuseqartoq, umiarsualivik, najugaqarfiit sumiiffissaat, sannavik, ikummatissaasivik qaartiterutissaasivillu, taakkununngalu atasumik attaveqarneq, suliassami aamma ilaatinneqassasut naatsorsuutigineqarpoq, ilanngullugu mittarfik ilaasinnaalluni.

Suliassamut tunngatillugu suliaqarneq maannakkut ingerlaqqissinnaalerpoq, kisianni sanaartornermut suliaqarnerup tamatumalu kingorna aatsitassarsiorfimmik ingerlatsinerup allartissinnaalernissaannut, akuersissutinut tunngatillugu suliassat arlallit suli suliarineqartussaapput. Maannakkorpiaq piiaanissamut matusinissamullu pilersaarutit kiisalu teknikkikkut akuersissuteqarnerit aamma London Mining Greenland A/S-ip, Namminersorlutik Oqartussat aamma kommunit marluk Qeqqata Kommuniata aamma Kommuneqarfik Sermersuup akornanni suleqatigiinnissamut isumaqatigiissut (Impact Benefit Agreemet) suliarineqarput. Suliassat taakkua piaartumik naammassineqassasut naatsorsuutigineqarpoq.

 

Annertunerusumik paasisaqarusunnermi attaveqarfissaq:

Aningaasaqarnermut Aatsitassanullu Naalakkersuisoq, Andreas Uldum: Oqarasuaat nr.:

Aqutsisoqarfimmi pisortaagallartoq Jørgen T. Hammeken-Holm: Oqarasuaat nr.: 346846