Ataatsimeeqatigiinneq pitsaasoq pissarsiffiulluartorlu

Naalakkersuisut Siulittaasuata Kim Kielsenip Ministeriunermik Helle Thorning-Schmidtimik Danmarkimi 7. januar 2015 ataatsimeeqateqarnini pitsaasutut nalilerpaa.

Naalakkersuisut Siulittaasuata Kim Kielsenip Ministeriuneq Helle Thorning-Schmidt Danmarkimi ualisoq 7. januar 2015 ataatsimeeqatigaa.

Naalakkersuisut Siulittaasuat Kim Kielsen ataatsimeereernermi ima oqarpoq:

- Nuannersumik pilersitsiviulluartumillu ataatsimeeqatigiippugut, tassani pissutsit maannakkorpiaq pingaarnerpaat ilai oqallisiginissaannut periarfissaqarluta. Eqqartukkatta ilagivaat Naalakkersuisut maannakkut politikkikkut aningaasaqarnikkullu pingaarnersiuinerminni salliutitaat, Pituffimmi Sakkutooqarfimmi kiffartuunneqarnissamut isumaqatigiissut aammalu urani pillugu ataatsimoorluni suliaqarneq.

Kim Kielsenip Kalaallit Nunaata aningaasarsiornikkut inissisimanera Ministeriunermut ilisimatitsissutigaa, tassani Naalakkersuisut aningaasarsiornikkut aaqqissuusseqqinnissanut pilersaarutaat, suliniutit naammassisassallu aggersut, soorlu sanaartornermut, suliffeqarnermut, ilinniartitaanermut, takornariaqarnermut isumaginninnermullu tunngasut nassuiaatigalugit.

- Oqaatigisinnaavara Naalakkersuisut danskit naalakkersuisuinik pitsaasumik angusaqarfiulluartumillu suleqateqarneq pingaartimmassuk, taamaattumik sapaatip akunnerani matumani danskit naalakkersuisuini suleqatitsinnik ataatsimeeqateqarnissarput siunertarlugu naalakkersuisuni ilaasortat arlaqarluta Danmarkimiippugut.

 

 

 

Paasisaqarnerorusuttut attavigisinnaavaat Tusagassiivimmi pisortaq Paornánguaq Kleist mobil +45 51815150, imaluunniit e-mail paok@nanoq.gl.