Naakkittaatsumik tigusinissaq kissaataanngilaq

Namminersorlutik Oqartussat NunaMinerals A/S naakkittaatsumik tigunianngilaa.

Sermitsiami decembarip 30/anni saqqummersumi allaaserineqarpoq Namminersornerullutik Oqartussat NunaMinerals A/S/imik naakkittaatsumik tigusiniarluni pilersaarutqartoq. 

Tamanna ilumuunngilaq.

Naalakkersuisut siulittaasua Kim Kielsen tamanna pillugu ima oqarpoq:

- Namminersorlutik Oqartussat NunaMinerals A/S-imik maanna oqaloqateqarneranut siunertaavoq, selskabip suliaasa ukiuni tulliuttuni ingerlanneqarnissaannut imminut akilersinnaasumik tunngaviliisoqarsinnaanersoq misissussallugu.

Ilusilersueqqinniarluni suliaqarnerup pisariaqartinneqartumik piffissaqarfigineqarnissaa qulakkeerniarlugu alloriarneq siulleq tassaasimavoq NunaMinerals A/S-ip januaarip naanerata tungaanut ingerlaannarnissaa qulakkeerniarlugu Landskarsimit  4,5 mio. koruuninik taarsigassarsitinneqarnera.

Imminut akilersinnaasumik ilusilersueqqinnissamik pilersaarusiornermi selskabip ingerlaqqinnissaanut nammineerluni aningaasaateqannginnera ilanngullugu eqqarsaatigineqartussaavoq. Selskabimut namminersortut piginneqataasullu aningaasaliinerutinnissaannut periarfissaqarsimanngilaq, NunaMinerals A/S-illu ukiuni tulliuttuni aningaasarsiulersinnaanera ilimanaateqarani.

Ilanngullugu nunani tamalaani aatsitassarsiornermi aningaasarliortoqarnera selskabip ujaasilluni suliniutaanut sunniuteqarnerlussimasinnaavoq.

- Tamanna tunngavigalugu NunaMinerals A/s piumaffigaarput selskabip nalinga arlaannut attuumassuteqanngitsumut nalilerteqqullugu. Aatsitassarsiorluni suliniutit nalingi ilumoortut aatsaat ilisimagaanni ingerlatsinissamut piviusorsiortumik pilersaarusiortoqarsinnaavoq selskabip ukiuni tulliuttuni ingerlannissaanut akileraartartut akiligaannik aningaasaliinissamut tunngaviusinnaasumik, Kim Kielsen oqarpoq, nangillunilu:

- Soorlu oqaatigereeriga NunaMinerals A/S-imik naakkittaatsumik tigusinianngilagut, aamma Namminersorlutik Oqartussat ilusilersueqqinnermi aningaasaliisartunik namminersortunik suleqateqarusuppoq. Aappaatigulli aamma uppertikkuminartuunngilagut, akileraartartullu NunaMinerals A/S-ip ilusilersoqqinnissaanut akiliissappata tamanna piviusorsiortumik naatsorsoqqissaakkamillu tunngaveqarluni pissaaq.

Paasisaqarnerorusuttut attavigisinnaavaat Naalakkersuisut siulittaasuata allattaa, Karen Motzfeldt, Naalakkersuisut Siulittaasuata Naalakkersuisoqarfia, oqarasuaat 34 50 00.