Carl Egedep Aningaasaateqarfianit nersornaasiineq

Stemningsbillede

Aalisartoq piniartorlu Carl Egedep Aningaasaateqarfianit nersornaaserneqarput

Carl Egedep Aningaasaateqarfiata siulersuisuisa decembarip 29-anni aalajangerpaat inuit marluk ukioq manna aningaasaateqarfimmit nersornaaserneqassasut.

Piniartoq utoqqalisoq aamma inuusuttunnguaq aalisartutut nunaqarfimmini maligassiuisoq nersornaaserneqartussatut aalajangerneqarluni. 

Nersornaaserneqartut tassaallutik:

• Albricht Kreutzmann, 54-nik ukiulik, Kangaamiut.

• Erninnguaq Kruse, 18-inik ukiulik, Niaqornat.

Aningaasaateqarfimmit nersornaaserneqartut tamarmik immikkut 5.000 koruuninik aningaasartalimmik nersornaaserneqarput.

Niaqornani KNAPP Erninnguaq Kruse pillugu ilaatigut ima innersuussaqarput:

- Erninnguup, eqeersimaartuusup ataatani ukiut sisamat matuma siorna anorersuaqisoq angalaqatigisimanngikkaluaruniuk ajorluinnartumik pisoqarsimassagaluarpoq. Anorersualeruttorfiani aalisariut 30 fodinik angitigisoq aquttarsimavaa, ataataata aalisariut kinngoqqunagu imaarsaraa.

Kangaamiuni KAPP Albricht Kreutzmann pillugu ilaatigut ima innersuussaqarput:

- Angallammik Inungasumik piginnittoq, Albricht Kreutzmann, ajoraluaqisumik tassanngaannartumik ukiut marluk matuma siorna ajoquserujussuarpoq, ullumikkut aalisarsinnaajunnaarneranik piniarsinnaajunnaarneranillu kinguneqartumik. Albricht Kreutzmannip Inungasoq ataataminit kingornussimavaa. Inungasup nunaqarfipput kommunilumi, Maniitsoq, ukiut 50-it sinnerlugit arferup neqaanik pissaqartitsisimavai. Taamaattumik isumaqarpugut Albricht Kreutzmann aningaasaateqarfiup malittarisassaata ilaanit allassimasoq tunngavigalugu tapersersorneqartariaqartoq, ima allassimasoqarmat; aalisartut piniartullu inuutissarsiortillutik ajoqusertut tapersersorneqarsinnaasut.

Nersornaaserneqartut najugaasa aalisartut piniartullu peqatigiiffiisa innersuussaraat aamma kommunalbestyrelsinit innersuussaallutik.

Aningaasaateqarfiup siunertaraa aalisartut piniartullu nersornaaserneqartassasut, uku nersornaaserneqartassallutik:

1. Aalisartut piniartullu ajunaarsimasut kinguaavi,

2. aalisartutut piniartutullu inuutissarsiornermi maligassiuisut,

3. aalisartut piniartullu utoqqanngortut,

4. aalisartut piniartullu inuutissarsiortillutik ajoqusersimasut,

5. aalisartut piniartullu toqusimasut, peqqitsillutik inuutissarsiornerminni maligassiuisuusimasut, eqqaassutissaannut,

6. immikkut pissutissaqartillugu aalisartut piniartullu, pingaartumik inuusuttut, aningaasaateqarfiup siulersuisa isumaat naapertorlugu tapiiffigineqarsinnaapput.

Nunaqarfinni aqutsisut allaffiini Carl Egedep aningaasaateqarfia sinnerlugu nersornaatit januaarip arferngat 2015 tunniunneqassapput.

Carl Egedep Aningaasaateqarfiata uku siulersuisorai; Aalisarnermut, Piniarnermut Nunalerinermullu Naalakkersoq Karl-Kristian Kruse, KNAPK-p siulittaasua Henrik Sandgreen aamma siulersuisuni ilaasortaq Leif Fontaine.

Attavigineqarsinnaavoq Gerda Knudsen, Aalisarnermut, Piniarnermut Nunalerinermullu Naalakkersuisoqarfimmi pisortaqatigiinnut allatsi. E-mail: gekn@nanoq.gl