Kalaallit Nunaata nunasiaataanerata oqaluttuassartaanik nutaamik isiginninneq

Kalaallit Saammaateqatigiinnissamut Isumalioqatigiissitaat pillugu maanna oqallinnermi Ilisimatusarfimmi oqaluttuarisaanermi lektori Thorkild Kjærgaard, Saammaateqatigiinnissamut Isumalioqatigiissitaq pillugu isummaminik saqqummiussivoq.

”Thorkild Kjærgaardip isumalioqatigiissitap atuutsinneqartariaqarnera apeqquserpaa. Isummanik taamaattunik saqqummertoqarnera soqutiginarpoq, kalaallit Saammaateqatigiinnissamut Isumalioqatigiissitaata suliaanik ersersitseqataagami.

Hr. Kjærgaardip ilaatigut innersuussutigaa qallunaat statsministeriata Helle Thorning-Schmidtip suliamut tassunnga Danmarkip peqataanissaanik kissaateqannginneranik saqqummiussaqarnikuunera. Tamanna tunuliaqutaralugu Kjærgaardip Kalaallit Nunaata nunasiaataanerata oqaluttuassartaanik saqqummiusseriarpoq qallunaat statsministeriata isummiussaanut tapersersuisumik. Qallunaat tungaannit kalaallit Saammaateqatigiinnissamut Isumalioqatigiissitaata maannamut paasissutissanik katersineranik, suli ingerlanneqarallartussamik, tamanna akuliunneruvoq.

Illuatungeriit tamarmik ilanngussaqarnissaat Saammaateqatigiinnissamut Isumalioqatigiissitamit kissaatigineqarpoq, taakkununnga ilaallutik qallunaat isummiussaat. Maannakkut ilanngussamut tunngatillugu oqaatigineqartut ima paasivarput, Kalaallit Nunaata nunasiaataasimaneranit oqaluttuaq qallunaat isumaannut, taamalu statsministerip isumaanut, naleqqussarlugu oqaluttuariniarneqartoq”, isumalioqatigiissitami ilaasortaq Klaus Georg Hansen naliliivoq nangilluni:

”Kisianni Saammaateqatigiinnissamut Isumalioqatigiissitamit kalaallit isummersuutaat pingaarnerutinneqarpoq, soorlu isumalioqatigiissitap suliassaannik nassuiaammi taamannak allassimasoqartoq. Tamassuma ilaatigut nassataraa Kalaallit Nunaata nunasiaataanermik oqaluttuassartaanik nutaamik isiginnilerneq, taamaalilluni Kalaallit Nunaata nunasiaataanermik oqaluttuassartaata qallunaanit taamaallaat saqqummiunneqartarneranit - soorlu maanna Kjærgaardimit saqqummersinniarneqartumit – allamik peqalerluni.

Sulinermi ilaatigut suut pisarsimasut assigiinngitsut nunatsinni inuiaqatigiinnik ilusilersueqataasimasut imminnut ataqatigiinnerat ersersinniarneqarput paasiniarneqarlutillu, pissutsit qallunaat oqaluttuarisaanermik allaaserinnittartut saqqummersitsinerminni ajoraluartumik takunngitsoorajuttarsimasaat, soorlu kingullertut Thorkild Kjærgaardip allaaserisaa taamaattunut assersuutissaalluartoq”, Saammaateqatigiinnissamut Isumalioqatigiissitaq sinnerlugu Klaus Georg Hansen naggasiivoq.  

 

Paasisaqarnerorusuttut attavigisinnaavaat Klaus Georg Hansen oqarasuaammut +299 547346  imaluunniit e-mail klaus@saammaatta.gl.