Raajartassat 14 procentinik ikileriarput

Stemningsbillede

Kitaanut raajanut 2015-imut pisassiissutit 73.000 tonsinut ikileriarput, siorna 85.000 tonsiusut 14 procentinik ikileriarlutik.

Naalakkersuisut ullumi decembarip 30-anni  2014 aalajangerpaat Kitaani aappaagu raajartassat 73.000 tonsiussasut, tamatumani EU-p 2.000 tonsit Canadamullu 6.100 tonsit ilanngunneqareerlutik. 

Tunumi 6.100 tonsit pisassiissutaassapput, tamatumani EU-p pisassai 5.500 tonsit aamma ilanngunneqareerlutik.

Aalisarneq pillugu siunnersuisooqatigiit oktobarimi aalajangerput immikkut suleqatigiissitamik ataatsimiititaliortoqassasoq, Kitaani 2015-imut raajartassat pillugit ataatsimut siunnersuusiortussamik.

Kitaani raajartassat aalajangerneqartussanngormata MSC-mik nalunaaqutaqartitsineq immikkut isiginiarneqarpoq.

Ukiumiit ukiumut pisassiissutit biologit innersuussutaannit sapinngisamik 10 procentinik ikinnerutinneqartassanngillat amerlanerutinneqaratilluunniit, aalajangiinissamut allamik pingaaruteqarluinnartumik pissutissaqartinneqanngippat.

Pisassat ikileriarujussuarnerinut ilaatigut tunngaviuvoq biologinit pisassiissutissatut siunnersuutigineqartut ikileriarneri, MSC-mik aamma nalunaaqutaqartitsineq attakkumallugu  pisassiissutit ikileriariarujussuartinneqarneri.

57 aamma 43 procentit

Naalakkersuisut aalajangerput Kitaani raajat 73.000 tonsit pisarineqassasut, taakkunanit canadamiut 1.939 tonsinik pisaqarsinnaallutik, EU-lu 2.000 tonsinik.  Sinneruttut 69.061 tonsit kilisaatinit nunatsinneersunit pisarineqassallutik. Maannakkut agguaassisarneq naapertorlugu pisassiisoqarluni: avataasiortut 57 procentinik sinerissallu qanittuani raajarniartut 43 procentinik pisassaqassallutik. 39.365 tonsit avataasiortunit pisarineqassasut 29.696 tonsillu sinerissap qanittuani pisarineqassallutik.

Tunu

Naalakkersuisut aalajangerput Tunumi raajartassat 6.100 tonsiussasut. 2014-imut pisassiissutaasunut 8.300 tonsiusunut 26,5 procentinik ikinnerupput. 6.100 tonsiusunit 600 tonsit nunatsinni kilisaataatileqatigiinnit pisarineqassapput, sinneruttut 5.500 tonsit EU-mit pisarineqassallutik. EU-mut isumaqatigiissut naapertorlugu pisassiissutaassallutik.

Aana attavissaq: Aalisarnermut, Piniarnermut Nunalerinermullu Naalakkersuisoqarfik, immikkoortortaqarfimmi pisortaq Emanuel Rosing. E-mail: Emanuel@nanoq.gl