2015-imi aalisarsinnaanermut akuersissutit januaarimi tunniunneqassapput

Aalisarnermut, Piniarnermut Nunalerinermullu Naalakkersuisoqarfiup aalisakkanut qalerualinnullu 2015-imi pisassiissutigineqartussat piareersaleruttorpai, pisassiissutigineqartussat Naalakkersuisunit akuerineqartussaallutik. Naatsorsuutigineqarpoq pisassiissutit ilaat Naalakkersuisunit januaarip qiteqqunnerani 2015-imi akuersissutigineqassasut.

Aalisarneq 2015-ip aallartinneranit unigani piniassammat Aalisarnermut, Piniarnermut Nunalerinermullu Naalakkersuisoqarfik matuminnga ilisimatitsissuteqarusuppoq.

  • Umiatsiaaqqanut, aalisariutinut meterinik 6-inik mikinernut, akuersissutit ulluni makkunani akuersissutigineqarlutillu aalisarsinnaanermut akuersissutilinnut kommuninullu nassiussuunneqaleruttorput.

Akuersissutit akuersissutigineqarput 2015-imut pisassiissutigineqartussat suli akuerineqanngikkaluartut.

Umiatsiaaqqat ataatsimut killilinnik pisassiiffiusuni imaluunniit killeqanngitsumik pisassiiffiusuni aalisarsinnaapput. Januaarip aallaqqaataanit 2015-imi aalisartoqarsinnaalluni pisassiissutit amerlassusissaat Naalakkersuisunit suli akuerineqanngikkaluartut. 

Avannaani qaleralinniartut qaammammut januaarimut pisassiissutigineqartut ukioq manna, 2014, qaammammut januaarimut pisassiissutigineqartut amerlaqataannik aalisarsinnaapput, 2015-imut pisassiissutigineqartussat aalajangerneqarnissaasa tungaannut aalisarneqarsinnaallutik.

  • Aqutsiveqarfinni ukunaniunngitsoq Qeqertarsuup Tunuani, Uummannami Upernavimmilu sinerissap qanittuani saarullinniartunut qaleralinniartunulluunniit 2015-imut akuersissutit ulluni makkunani akuersissutigineqartarput

Aalisariutit  ataatsimut killilinnik pisassiiffiusuni imaluunniit killeqanngitsumik pisassiiffiusuni aalisarsinnaapput. Akuersissutinik akuersisoqarpoq 2015-imut pisassiissutissat amerlassusissaat suli akuerineqanngikkaluartut.

  • Sinerissap qanittuani aqutsiveqarfinni Qeqertarsuup Tunuani, Uummannami aamma Upernavimmi aalisariutit aalisalersinnaanissaannut  akuerineqarput, nalinginnaasumik januaarip aallaqqaataanit 2015-imi aalisalersinnaalerlutik.

Qaleralinnut 2015-imut pisassiissutissat januaarip qiteqqunnerani 2015-imi aatsaat aalajangerneqassapput. Pisassanik suli aalajangersaasoqanngikkaluartoq aalisarneqarsinnaasunik akuersisoqarpoq, aalisarneq unigani pisinnaassammat. Tassa aalisartut taakka 2014-imi akersissutertik atuunnarsinnaavaat.

  • Sinerissap qanittuani assagiarsunniartut qinnuteqarnerminni immersuiffissamut paasissutissatut allassimassavaat sumi assagiarsunniassanerlutik

Immersuiffissaq www.sullissvik.gl-imi pineqarsinnaavoq. Aalisarnermut, Piniarnermut Nunalerinermullu Naalakkersuisoqarfiup qinnuteqaat suliarissavaa akuersissuteqassallunilu.

2015-imut suli pisassiisoqanngikkaluartoq akuersissummik akuersissutiliisoqassalluni. Ataatsimut pisassiiffiusuni nalinginnaasumik assagiarsunniartoqassaaq. Tassa aalisartut taakka aamma 2014-imi akersissutertik atuunnarsinnaavaat.

  • Naatsorsuutigineqarpoq sinerissap qanittuani avataanilu raajarniartut ukiumut pisassaasa akuersissutigineqarnissaat una qaammat naanngitsoq nalunaarutigineqassasut

Nalinginnaasumik raajarniartoqassaaq

  • Aalisariutit avataasiortut raajarniartuunngitsut aalisarsinnaasaannik akuersissuteqartoqassaaq

Aalisariutit avataasiortut aalisagartassaat januaarip qiteqqusimalernerani 2015-imi aalajangersaavigineqarnissaat naatsorsuutigineqarpoq.

Aalisarnermut, Piniarnermut Nunalerinermullu Naalakkersuisoqarfiup aalisartitsisoqatigiit maannakkut attavigisarpai oqaloqatigisarlugit aalisariutit sorliit aalisalernissaannut akuersissuteqarsinnaanersut pillugit, aalisarneq nalinginnaasumik unittoorfiunngitsumik ingerlaannaqqullugu.

2015-imut pisassat Naalakkersuisunit akuersissutigineqariarpata agguaanneqassapput, 2015-imut aalisarsinnaanermut akuersissutit kingorna akuerineqassallutik. Pisassiissutit akuerineqariarpata www.Naalakkersuisut.gl-ikkut nalunaarutigineqassapput.

Attavigineqarsinnaavoq: Aalisarnermut, Piniarnermut Nunalerinermullu Naalakkersuisoqarfik, immikkoortortaqarfimmi pisortaq Emanuel Rosing. E-mail: Emanuel@nanoq.gl