Kommuneqarfik Sermersuumi allakkatigut taasinerit pingasut nassaarineqarput

Kommuneqarfik Sermersuumi allakkatigut taasinernik pingasunik nassaartoqarnera pillugu tusagassiorfinnut nalunaarut.

Qinersinermut ataatsimiititaliaq Kommuneqarfik Sermersuumit ulloq 19. december 2014-imi allakkatigut taasinernik pingasunik nassaartoqarsimanera pillugu saaffiginnissummik 22. december 2014-imeersumik tigusaqarpoq.

Saaffiginnissummi takuneqarsinnaavoq,

Taasineq ataaseq Qaqortumi taasivimmut tunngassuteqartoq

Taasineq ataaseq Qeqertarsuatsiaani taasivimmut tunngassuteqartoq

Taasineq ataaseq Nuummi taasivimmut tunngassuteqartoq

Qinersinermut ataatsimiititaliaq aalajangiivoq allakkatigut taasinerit pingasut ammarneqassanngitsut, tassami qinersinerup allanut takoqqusaannginnera unioqqutinneqassammat. Nalorninarporlumi allakkatigut taasinerit marluk taasivinnut Nuup avataaniittunut ingerlateqqillugit nassiunneqartussaasimagaluartut qinersineq naammassineqartinnagu apuussimasinnaasimassagaluarnersut, tassami ulloq qinersivik 28. november 2014 ullormik ataatsimik sioqqullugu taasinerit tunniunneqarsimammata.

Qinersinermut ataatsimiititaliap Kommuneqarfik Sermersuumi Qinersinermik siulersuisut assut isornartorsiorlugit oqaaseqarpoq, tassami kommunip arlaleriarluni allakkatigut taasinerit qinersinermut inatsimmi aalajangersakkat malillugit suliarisarsimanngimmagit. Innuttaasut tamatumunnga atatillugu eqqortumik sullinneqarnissartik naatsorsuutigisariaqarpaat pisumili tassani ajuusaarnaraluartumik taamaassimanngilaq.  

Qinersinermut ataatsimiititaliaq naliliivoq ima annertutigisumik kukkusoqarsimanngitsoq Kalaallit Nunaanni Inatsisartunut qinersisarneq pillugu Inatsisartut inatsisaat nr. 9, 31. oktober 1996-imeersumi § 50, imm. 2 malillugu qinersineq atortussaanngitsutut nalunaarutigineqassalluni.

 

Nuuk ulloq 29. december 2014.

Svend Hardenberg

Qinersinermut Ataatsimiititaliami siulittaasoq

Oqa. 34 50 00