Ujarassiorit 2014-imi ajungaasut toqqarneqarput

Laura Jensen Narsami najugaqartoq unammisitsinermi Ujarassiorimmi akissarsiassaq annerpaaq eqqorpaa, akileraarutitaqanngitsunillu 55.000 kronenik akissarsitinneqarluni.

Laura Jensen Narsamiit avannaani Eqaluit Iluanni sumiiffinni imminnut qanittuni pingasuni ujaqqat aatsitassartallit qaarsumeersut nassaarisimasaasa misissorneqarnerisigut paasinarsivoq 3-4%-imik zink-imik, 0,3 %-imik aqerlumik aamma tonsimut 500 gram-imik molybdenimik akoqartut. Laura Jensinip ujaqqanik nassaarfimik qularnaatsumik sumiiffiliisimanera ujaqqanillu naammattunik angussusilinnik Ujarassiorimmut tunniussisimanera pissutaalluni nassaarfiup nunaata sananeqaataanut tunngasut ujarassiornikkut paasissutissat pingaaruteqartut pissarsiarineqarput.

“Aasat tamaasa ujaqqanik katersisarpugut, umiatsiamik angalaartilluta nunamulluunniit igaasariartilluta ujarassiortarpugut meeqqavullu ujaqqat suuneri suminngaanneernerilu pillugu oqaluttuarlutigit”, taamak oqaluttuarpoq Laura Jensen Ujarassiorimmi peqataasartoq. Laura Jensen 1997-imi Ujarassiorit-mi ajungaasutut toqqarneqarpoq kingornalu ukioq alla ajungaasut tulliattut toqqarneqarsimalluni.

Ukiormanna aappaattut akissarsiassaq akileraarutitaqanngitsunik 25.000 kronenik naleqartoq, Saqqameersumit Dina Jensen-imit pissarsiarineqarpoq. Taassuma ujaqqat Saqqap eqqaaneersut aligortaqarlutillu sulfide-inik aatsitassartallit akoraat 26 % zink, 8% aqerloq siilvilu tonsimut 80 gram.

Marluk pingajuusutut akissarsitinneqarput immikkullu akileraarutitaqanngitsunik 10.000 kronenik akissarsitinneqarlutik.

Arsummiit Ejnar Jakobsen ujaqqamik qaarsumeersumit sulfid-italimmik nassaarsimasoq. Ujaqqarak kanngussammik 0,9 %-imik kuultimillu tonsimut 0,1 gram-imik akoqarpoq

Pingajuattut akissarsisup aappaa Qaarsormiuuvoq, tassa  Akaaraq Hansen ujaqqamik agat-imik Qaarsut kitaaneersumik silineqarluni kusanartutut pinnersaasiarineqarsinnaasumik nassiussaqartoq

Sisamat akileraaruserneqanngitsunik 5.000 kronenik immikkut akisssarsitinneqarput:

• Nuummiu Peter Lynge Petersen Nuup kujammut kangiani Ameraliup paavani molybdænglans-imik nassaartoq.

• Hans Peter Lennert, Sisimiut, ujaqqamik aligoqqiinik akoqartartumik kimberlit-imik Kangerluarsuup Ungalliup paavani nassaartoq.

• Tobias Danielsen Kullorsuarmeersoq ujaqqamik hæmatitsimik 63 % - imik savimminermik akulimmik Kullorsuup eqqaani Saarliani nassaartoq.

• Hans Sanimuinnaq Kuummiuniit ujaqqamik agiarmik savimminissartarlimmik Tasiiliap Illoqqortoormiullu akornanni Kangerlussuup kangiani nassaartoq.

Nuna tamakkerlugu ujarassiorluni unammisitsisarneq ”Ujarassiorit” ukiut 25issaanni maanna ingerlanneqarpoq. Kikkulluunniit ujaqqamik nassaaminnik ujarassiuunut misissortikkusutaminnik allakkerivikkut akiliinatik nassiussisinnaapput. Ujarassiorluni unammisitsisarneq pillugu nittartakkami www.ujarassiorit.gl –imi paasissutissanik misissuisinnaapput. 

 

                                         Assimi ujaqqanik nassaarfiit takuneqarsinnaapput:

 

 

 

Ujagaasunik akissarsisitsinermit assilisat uani takukkit.

 

Ujarassiorit-mut ujaqqat misissugassat ukiut ingerlanerini nassiunneqarsimasut pillugit paasissutissat
 uani atuarneqarsinnaapput. 

 

Akissarsisitsinermi oqalugiaat uani atuaruk.

  

Inuussutissarsiornermut, Aatsitassaqarnermut Suliffeqarnermullu Naalakkersuisoqarfik Ujarassiorimmik aningaasalersuisuullunilu allaffissornikkut ingerlatsisoqarfiuvoq. Akissarsiallu aningaasaateqarfinnit suliffeqarfinniillu ataani takutinneqartunit aningaasalersorneqarput.

Aningaasaliisutut pingaarnertut Grønlansbanken-ip Inuussutissarsiornermut Aningaasaateqarfia Ujarassiorit 2014-imut 40.000 kronenik aningaasaliissuteqarpoq.

Xploration Services, Hudson Resources Inc., LNS Greenland A/S aamma KGHM International tamarmik immikkut 10.000 kronenik aningaasaliissuteqarput.

 

Ujarassiorit pillugu aamma ajugaasut pillugit paasisaqarnerorusukkuit attavigiuk:

Inuussutissarsiornermut, Aatsitassaqarnermut Suliffeqarnermullu Naalakkersuisoqarfimmi Ujarassiooq Jonas Petersen, +299 34 65 49 e-mail: jpet@nanoq.gl

Ujarassiorit 2014-imi ajungaasoq Laura Jensen, Narsaq saaffiginearsinnaavoq oqarasuaammut:+299 26 33 22