NunaMinerals A/S-ip annaanneqarnissaanut pilersaaruteqartoqarpoq

Ingerlatseqatigiiffik ilaannakuusumik Namminersorlutik Oqartussanit pigineqartoq NunaMinerals A/S piffissap sivisuup ingerlanerani aningaasalersuinissamut tunngatillugu ajornartooqqavoq. Tamanna maannakkut 2015-imi januaari ilanngullugu ingerlatsinermik qulakkeerisussamik, Namminersorlutik Oqartussat ingerlatseqatigiiffimmut 4,5 million koruuninik taarsigassarsisitsinerannik malitseqarpoq.

Piffissami aatsitassarsiorfinnik aamma aatsitassarsiorluni misissuinermik suliaqartut ilungersunartorsioraluartut, NunaMinerals A/S-ip ingerlateqqinnissaa Namminersorlutik Oqartussat anguniagariuarsimavaat.

Namminersorlutik Oqartussat 4,5 million koruuninik taarsigassarsisitsinissamik akuersissuteqarnerannut atatillugu, ingerlatseqatigiiffiup nalingata avataaneersumit nalilersortinneqarnissaanut NunaMinerals A/S akuersivoq. Tamatuma kingorna ingerlatseqatigiiffimmut tunngatillugu suliap ingerlanerata ingerlaqqinnissaa qulakkeerniarlugu, immikkut ittumik ataatsimeersuarnissamut aggersaasoqassaaq, 2015-imi januaarimi pissasoq naatsorsuutigineqarluni.

Taamaaliornermi Namminersorlutik Oqartussat neriuutigaat NunaMinerals A/S-ip suliaqarnerata ingerlaqqinnissaanut isumannaannerusumik tamanna tunngavissiisinnaassasoq.

"Naalakkersuisut sinnerlugit nuannaarutigaara,  NunaMinerals A/S-ip siunissaata paasinarsisinneqarnissaanut siunnerfilimmik suliaqartoqarmat, aammalu ingerlatseqatigiiffiup siunissami ukiorpassuarni atuunnissaa qulakkeerniarlugu, annaanneqarnissaanut pilersaarutip iluatsinnissaa qilanaaraara," taama oqaaseqarpoq Naalakkersuisut Siulittaasuat, Kim Kielsen.

 

 

 

Paasissutissat annertunerusut pissarsiarineqarsinnaapput saaffiginninnermi uunga:

 

Naalakkersuisoqarfimmi pisortaaneq
Svend Hardenberg
Naalakkersuisut Siulittaasuata Naalakkersuisoqarfia
Tlf. nr. +299 34 50 00
E-mail: svha@nanoq.gl