Inuuneritta Pulje peqqissutsimik suliniutinut aningaasanik agguaavoq

Peqqissutsimut Nunanillu avannarlernik suleqateqarnermut Naalakkersuisoq, Doris Jakobsen, peqqissutsimik siuarsaanernut pinaveersaartitsinermilu suliniutinut assigiinngitsunut 22-nut Inuuneritta Puljemit 188.000 koruunit agguaateqqammerpai.

”Inuunerittamut aningaasaliissutinik agguaaneq Naalakkersuisutut suliama siulliit ilagaat. Nuannaarutigeqaara sumiiffinni suliniutinut pitsaasunut, nunatsinnilu peqqissutsimik pitsanngorsaasunut taperseeqataasinnaangama, oqarpoq Peqqissutsimut Nunanillu avannarlernik suleqateqarnermut Naalakkersuisoq, Doris Jakobsen.

Ukiaq manna 46-t qinnuteqarsimapput. Meeqqat, inuusuttut ilaqutariillu peqqissusaat inuunerullu pitsaassusaa pillugit suliniutit, kiisalu pujortartarnermik pinaveersaartitsinermik suliniut Kalaallillu Nunaani pujortartannginnermut tapersiisut, imigassamik ikiaroornartumillu pinaveersaartitsinerit ukioq manna isiginiarneqarput.

Immikkoortuni ukunani suliniutinut tapersiisoqarpoq:

 

  • Pujortartarnermik pinaveersaartitsineq pujortarunnaarniartarnerlu pillugu paasisitsiniutit.
  • Timip aalatinneruneranik pinaveersaatitsineq
  • Suliniutit meeqqat inuusuttullu akissakinnerusut peqqinnarnerusumik inuuneqarnissaannik periarfissiisut.
  • Naamaarnermik pitsaaliuineq

 

Inuuneritta Pulje Kalaallit Nunaani innuttaasut peqqissusaat pillugu suliniutip Inuuneritta atuutilersinneqarneranut atatillugu pilersinneqarpoq. Peqqissutsimik siuarsaanermut pinaveersaartitsinermilu suliniutinut aningaasanik ukiumut marloriarluni qinnuteqaateqartoqarsinnaavoq.

Inuuneritta Pulje sumiiffinni pinaveersaartitsinernut peqqissutsimillu siuarsaanermi suliniutinut, Inuuneritta II-mut attuumassuteqartunut, tapersiisarpoq. Ukioq manna pujortartarnerup pinaveersimatinneqarnissaa suliniuteqarfiuvoq.

Inuuneritta Puljemut qinnuteqarnissamut killissarititaq tulleq tassaavoq 1. april 2015. Aappaagu timersorneq, timip aalatinnerunissaa suliniuteqarfiussooq. Qinnuteqarnermi immersugassaq puljelu pillugit annertunerusumik www.peqqik.gl takuuk.

 

 

Paasisaqarnerorusuttut attavigisinnaavaat Paasissutissalerisoq Aqissiaq Møller Mathiassen, oqarasuaat +299 34 66 90, e-mail: aqma@nanoq.gl imaluunniit Peqqissutsimut Siunnersorti Lisa Christiansen, oqarasuaat +299 34 66 50, e-mail: lich@nanoq.gl.