Peqqinnissamut aningaasanik agguaaneq

Peqqissutsimut Nunanillu Avannarlernik Suleqateqarnermut Naalakkersuisoqarfimmit peqqinnissamut aningaasanik agguaaneq pillugu tusagassiorfinnut nalunaarut.

Peqqinnissamik ilisimatusarnermut Peqqissutsimut Nunanillu Avannarlernik suleqateqarnermik Naalakkersuisoqarfimmit Peqqinnissamut aningaasanik agguaassinissaq Peqqinnissamut Naalakkersuisup Doris Jakobsenip ullumikkut akueraa.

”Peqqinnissamik ilisimatusarnermik assigiinngiiaartorpassuarnillu suliniuteqarnissamik soqutiginnittoqartorujussuunera nuannaarutigaara”, Doris Jakobsen oqarpoq nangillunilu ”Nunatsinnit ilisimatusartunit amerlasuunik qinnuteqartoqarnera aamma nuannerpoq. Peqqinnissaqarfiup ineriartortinneqarnissaanut Peqqissutsimut Naalakkersuisutut kissaatigisannut isumalluarnarpoq”.

Uku aningaasaliiffigineqarput:

Nakorsaq Carl Frederik Brandt Simony uummatip nukiani (purulent perikarditis) aseruuttarneq pillugu ilisimatusarnissamut. Nappaat toqussutaasartorujussuaq. ilisimatusarneq pillugu allaatigisap saqqummersinneqarnissaanut 8.978 kr-nik taperneqarpoq.

Nakorsaq Nadja Albertsen ukiuni kingullerni tallimani Kalaallit Nunaanni syfilisertarneq pillugu ilisimatusarneq. Ilisimatusarneq allaatigisap allanissaanut saqqummersitsinermilu aningaasartuutinut 13.930 kr.-nik taperneqarpoq.

Sociologi, PhD Christina Viskum Lytken Larsen 2015-imi Finlandimi Oulumi ataatsimeersuarnissami The 16th International Congress on Circumpolar Health – Focus on Future Health and Wellbeing-imi ilisimatusarnermit paasisanik saqqummiussinissamut atatillugu aningaasartuutit matussutissaatut tapersiissutit. Qinnuteqaat 8.500 kr.-nik taperneqarpoq.

Nakorsaq Louise Holm Schæbel nerisat uummatip taqarsuini nappaatit pilertarnerinut pingaaruteqartunik misissuinermut. Ilisimatusarnissap aallarnisarnissaa 30.000 kr.-nik taperneqarpoq.

Cand. Scient Nina O. Nielsen vitaminip D-p Kalaallillu Nunaanni sukkornerup imminnut atanerat pillugu misissuinermut. Ilisimatusarneq allaaserisap allannissaanut atatillugu 50.000 kr.-nik taperneqarpoq.

Tamassuma saniatigut 2015-imi oktobarimi Peqqinnissamik ilisimatusarneq pillugu sapaatip akunneqartitsinissamut 40.000 kr.-nik tapersiisoqarpoq. Tapersiissutit ilinniartitsisut PhD-ngorniallu angalanissaannut tapiissutitut tunniunneqarput.

 

Attaveqarfissaq:

Nakorsat suliassaat pillugit siunnersorti Birgit Niclasen, Peqqissutsimut Nunanullu Avannarlernut attaveqarnermut Naalakkersuisoqarfik. Telefoni: 34667, maili: bivn@nanoq.gl.