Pissakinnerusut juullimi aaqqissuussinissaannut ikiorserneqassapput

Nunarput tamakkerlugu ilaqutariit pissakinnerusunut juullikkunni aaqqissuussinissaminnut ikiorserneqartussanngortut.

Ukiut siulii assigalugit Ilaqutariinnermut, Naligiissitaanermut Isumaginninnermullu Naalakkersuisoqarfik ukioq manna ilaqutariinnut pissakinnerusunut juullikkunni aaqqissuussinissanut ikiorsiiniarpoq.

Ilaqutariinnut pissakinnerusunut tunngatillugu juullikkunni aaqqissuussinissanut kommunit aningaasanik qinnuteqarsimapput tapiiffigineqarlutillu. Nunaqarfiit illoqarfiillu 43-t aningaasanik tapiiffigineqarsimapput  - kangiani Tasiilamit, kitaani Maniitsumut, avannaani Qaanaamut kujataanilu Qaqortumut, soorluttaaq nunatsinni nunaqarfiit tamarmik aningaasanik tapiiffigineqartut.

2014-imi juullikkunni aaqqissuussinissanut aningaasat 400.000 kr. missaat tapiissutigineqarput. Aningaasat juullikkunni aaqqissuussinissanut assiginngitsorpassuarnut atorneqassapput. Assersuutigalugu Siorapalummi ilaqutariit aalisartukkormiut piniartukkormiullu juullikkuni nereqatigiinnissaat tapiiffigineqarpoq, Niaqornaarsummilu anaananut kisermaanut juullikkuni aaqqissuussinissanut tapiissuteqartoqarluni. Juullikkunni aaqqissuussinerit assigiissutigaat ilaqutariinnut pissakinnerusunut tamarmik tunngatinneqarmata.

Ilaqutariinnermut, Naligiissitaanermut Isumaginninnermullu Naalakkersuisoq, Martha Lund Olsen, oqarpoq: ”Juulli tamatsinnut isumaqartorujussuuvoq. Taamaattumik nuannaarutigaara inunnut pisariaqartitsinerusunut nunarput tamakkerlugu juullikkunni aaqqissuussinissanut assigiinngitsunut ukioq maannattaaq ikiorsiisinnaagatta. Tamanna kissalaartumik tapersiineruvoq.” 

 

Paasissutissat annertunerusut Niels Thomas Andersenimut, nita@nanoq.gl, telefon 345339 saaffiginninnikkut pissarsiarineqarsinnaapput.