DIP 2015-imi tallimanngornerni arfineq marlunni matoqqasassaaq

Dronning Ingridip Peqqissaavia 2015-ip aallartisimalernerani tallimanngornerit arfineq marluk matoqqassaaq

Novembarip ulluisa 18-anni 2014 Nuummi Dronning Ingridip Napparsimmavissuani napparsimasut pillugit qarasaasiakkut nalunaarsuissut atuutilersinneqarpoq. Tullinnguupput sinerissami qitiusumik immikkoortoqarfiit, siulliunneqartorlu tassaavoq Peqqinnissaqarfik Sermersuumi qitiusumik immikkoortortaq Nuummi Dronning Ingridip Peqqissaavia. Atuutilersitsiniarnermi sulisut peqataanissaat pisariaqarpoq, innuttaasullu annikinnerpaamik sunnerneqarnissaat anguniarlugu sapinngisaq tamaat piffissaq sivikinnerpaaq atorniarneqarmat, tallimanngornerit ilanngullugit sap. akunnerisa naaneri arfineq marluk suliniummut tamatumunnga atorniarneqarput. Tamanna Peqqissaaviup tallimanngornerni arfineq marlunni ukunani matoqqasariaqarneranik kinguneqarpoq:

  • Tallimanngorneq januaarip ulluisa 23-anni 2015
  • Tallimanngorneq januaarip ulluisa 30-anni 2015
  • Tallimanngorneq februaarip ulluisa arfernanni 2015
  • Tallimanngorneq februaarip ulluisa 13-anni 2015
  • Tallimanngorneq februaarip ulluisa 20-anni 2015
  • Tallimanngorneq februaarip ulluisa 27-anni 2015
  • Tallimanngorneq marsip ulluisa arfernanni 2015

Tallimanngornerni matoqqaviusuni innuttaasut qanoq periarfissaqarpat?

  • Tallimanngornerni pineqartuni sap. ak. naanerini periarfissat assigalugit 34 44 00 –imut sianernikkut nakorsamut attaveqarniarluni saaffiginnittoqarsinnaavoq.
  • Ajutoortut nappaammilluunniit inuunerminnik navianartorsiortut, pisarnertut ambulance-mut 344 112 sianissapput/siarnutigineqassapput
  • Meeraaqqerisunut angerlarsimaffinnilu peqqissaasunut attaveqarsinnaanerit allannguuteqassanngillat.
  • Inuunerissaaviit tupatorunnaanissamullu siunnersuisartut, tallimanngornerni pineqartuni attavigineqarsinnaassanngillat.
  • Qarasaasiakkut nakorsamut attaveqarfissaq www.doktor.gl atorneqarsinnaavoq akissutisinissarli ullut sisamat pallillugit utaqqisariaqarsinnaassaaq.

Napparsimasut pillugit qarasaasiakkut nalunaarsuissut napparsimasunik sullissinermut pitsaannguutaassaaq
Peqqissutsimut Pitsaaliuinermullu Aqutsisoqarfiup pisortaa Jóanis Erik Køtlum ima oqaaseqaateqarpoq:
- Piffissaq qaninneq eqqarsaatigalugu tallimanngornerit tulleriit arfineq marluk Dronning Ingridip Peqqissaavianut nalinginnaasumik nakorsiartitsinngikkallassaagut.
Tamannali piffissaq ungasinnerusoq isigalugu iliuusaavoq annikitsoq. Qarasaasiakkut nalunaarsuissut sumiikkaluaraanniluunniit nalunaarsukkat pissarsiarineqarsinnaalernissaat pissutigalugu, innuttaasunut toqqissinarneruvoq. Sulisut napparsimasut pillugit qarasaasiakkut nalunaarsuiffittaarnikkut, ataatsimoorussamik napparsimasut nakorsartinnerminnut atatillugu aqqusaartugaannik pitsannguisussamik, qarasaasiakkut sullississutitaassapput. 

Kalaallit Nunaanni napparsimasut pillugit qarasaasiakkut nalunaarsuissut

  • Napparsimasut pillugit qarasaasiakkut nalunaarsuissummik atuutilersitsinissaq politikkikkut akuersissutaavoq. Novembarip ulluisa 18-anni 2014 Nuummi Dronning Ingridip Napparsimmavissuani atuutilersinneqarpoq.
  • Oqaatigineqareersutut sinerissami atuutilersitsiniarneq Dronning Ingridip Peqqissaaviani aallartinneqassaaq.
  • Suliniut piffissaq naatsorsuutigisaq naapertorlugu ingerlanneqarmat, 2016 naatinnagu nunarput tamakkerlugu atuutilernissaa naatsorsuutigineqarpoq.

 

Paasisaqarnerorusuttut nakorsat qullersaat Anne-Marie Ulrik mail-ikkut  amu@peqqik.gl  attavigisinnaavaat.