Knud Kristiansen sulilluni aallartippoq

Siumut, Demokraatit aamma Atassut sinnerlugit Naalakkersuisunngortut tallimanngornermi 12. december 2014 Inatsisartunngortunit akuerineqarput, taamaalilluni aamma Ineqarnermut, Sanaartornermut Attaveqarnermullu Naalakkersuisoq Knud Kristiansen Naalakkersuisutut ivertinneqarpoq.

- Inatsisartunut qinersineq suaarutigineqarmat Atassummut uannullu partiip siulittaasuatut pingaaruteqarluinnarsimavoq Ineqarnermut Naalakkersuisoqarfiup Atassummit tigummiinnarneqarnissaa qulakkeerniassallugu, ilisimaneqartutummi Atassut sinnerlugu Naalakkersuisoqarfimmi tassani Siverth K. Heilmann Naalakkersuisutut sineriassuatsinni innuttaasut iluarisimaagaannik sulilluarsimavoq, taamaammallu sulinerup ingerlateqqinnissaa uagutsinnut pingaaruteqarsimaqaaq, qujanartumillu qinersinerup kingorna tassa iluatsippoq. Taamatuttaaq Ineqarnermut Sanaartornermut Attaveqarnermullu tunngassuteqartut ataatsimuulerseqqinneqarnerat assut iluarisimaarpara, suliassaqarfiimmi taakku imminnut ataqatigiissumik suliarineqarsinnaaleqqinneri inuiaqatigiit iluaqutissiffigilluassagaat qularutiginngilara, Knud Kristiansen oqarpoq.

Naalakkersuisooqatigiit isumaqatigiissutaat annertuumik inuussutissarsiutit siuarsaavigineqarnissaannik imaqarpoq, inuussutissarsiutillu pitsaasumik siuarsaavigineqassappata ataqatigiissumik ineqarnermut, sanaartornermut aammalu attaveqarnermut tunngatillugu nunatsinni inoqarfiit inerisarneqarnissaat qitiulluinnarpoq.

- Naalakkersuisoqarfigilikkanni sulisut pikkorissut, tunniusimasut aalajaatsullu suleqatigilluinnarlugit Inatsisartut suliakkiutaat suliarissavagut, taamatuttaaq nunatsinni kattuffiit suliassaqarfigilikkannut attuumassuteqartut qanimut suleqatiginissaat pingaartippara, tamattami suleqatigiinnitsigut nunatsinni siuarsaaneq kissaatigisarput pitsaasumik timitalersorsinnaavarput, Knud Kristiansen oqarpoq.

Knud Kristiansen 2. februar 1971-mi Upernavimmi inunngorpoq, qatanngutigiinni quliusuni nukarlersaalluni, pingasunik qitornaqarpoq nuliaralugulu Justine Svendsen.

Knud Kristiansen Upernavik Kommuniugallarmat Kommunalbestyrelsemi ilaasortaasimavoq taamatuttaaq manna tikillugu Qaasuitsup Kommuniani Kommunalbestyrelsemi ilaasortaalluni, Naalakkersuisunngornerminulli atatillugu sulinngiffeqarnissaminik qinnuteqarpoq, taamatuttaaq Kalaallit Nunaanni Kommunit Kattuffianni KANUKOKA-mi siulittaasup tulliata aappaatut ilaasortaanikuuvoq. Minnerunngitsumillu Knud Kristiansen, piffissani arlariinni sinniisussatut Inatsisartuni ilaasortatut sulisareerami, Inatsisartuni sulinermik sukumiisumik misilittagaqarluarpoq.

 

 

Paasisaqarnerorusuttut attavigisinnaavaat Naalakkersuisup allattaa politikkikkullu siunnersortaa Jensine Berthelsen oqarasuaammut +299 345450, mobilimut +299 532303 imaluunniit e-mailimut jebe@nanoq.gl.