Inatsisartunut qinersinerup inernerani allannguutit

Novembarip 28. 2014 Inatsisartunut qinersinermit qinersinerup inernerani allannguutit.

Kalaallit Nunaanni Inatsisartunut qinersisarneq pillugu Inatsisartut inatsisaanni nr. 9-mi, 31. Oktober 1996-imeersumi § 50 naapertorlugu, qinersinerup atorsinnaassusia pillugu qinersinerup kingusinnerpaamik qinersinerup kingorna ullut arfineq marluk qaangiutsinnagit qineqqusaartut aamma qinersisartut kialluunniit naammagittaalliuutigisinnaavaa.

Qinersinermut Ataatsimiititaliaq ullumikkut ataatsimiippoq.

Taasissutit qinersinerup unnuani Narsap katersortarfiani atuutinngitsutut nalunaarutigineqartut atuunnerisa misissorneqarnissaat pillugu qineqqusaartup kissaatigalugu naammagittaalliutaa Qinersinermut Ataatsimiititaliap Kommuni Kujallermi Qinersinermik siulersuisunit tiguaa.

Qinersinermut ataatsimiititaliaq aalajangerpoq, Narsami qinersivimmi taasissutit 13 atuutinngitsutut nalunaarutigineqartut akuerineqassasut.  Tamanna isumaqarpoq taasissutit 13 makku qinersinerup inerneranut atuuttutut ilanngunneqassasut:

Andreas Uldum, Demokraatit taasissut 1

Sara Olsvig, Inuit Ataqatigiit taasissutit 4

Naja Lund, Inuit Ataqatigiit taasissut 1

Kim Kielsen, Siumut taasissutit 4

Ineqi Kielsen, Siumut taasissut 1

Suka K. Frederiksen, Siumut taasissut 1

Aqqaluaq B. Egede Inuit Ataqatigiit taasissut 1

Tamassuma malitsigisaanik Suka K. Frederiksenip aamma Jess Svanep akornanni makitsisoqarpoq, qineqqusaartut marluullutik 172-inik taasiseqaramik. Jess Svane kingullertut qinigaasinnaatitaavoq taavalu Suka K. Frederiksen tassaasimavoq sinniisussaq siulleq. Makitsinerup Qinersinermut ataatsimiititaliap suliarisaata malitsigissavaa, Suka K. Frederiksen Siumut sinnerlugu kingullertut qinigaasoq taavalu Jess Svane Siumut sinnerlugu sinniisussanngortoq siulleq.

Ataatsimiinnermi aamma aalajangerneqarpoq, taasissut 1 Maniitsumi qinersivimmi kukkusoqarneratigut atuutsinneqanngitsoq atuuttutut akuerineqassasoq. Taasissut Gerth Nielsenimut Inuit Ataqatigiit tuppoq. Tamanna qinigaasinnaasut agguataarnerinik imaluunniit sinniisussat allattorsimaffiannik allannguuteqartitsinngilaq.

Qaqortumi Qinersinermik siulersuisut qinersinermi atortut Qinersinermut ataatsimiititaliamut nassiunnissaannut piareersarnermut atatillugu kukkusoqarnera paasivaat. Kukkuneq paasineqartoq tassaavoq Partii Inuit sinnerlugit qineqqusaartunut taasissutit 3 paarlaanneqarsimasut. Taasissutit 3 Per Rosingimut allanneqarsimapput naak taakku parteeqataanut Per Rosing-Petersenimut taasissutaasut. Qinersinermut ataatsimiititaliaq aalajangerpoq kukkuneq qinersinerup naatsorsornerani iluarsineqassasoq.

Aammattaaq Demokraatit sinnerlugit qineqqusaartut akornanni sinniisussat allattorsimaffiannit makitsisoqarpoq,  qineqqusaartut 4 tamarmik immikkut 11-nit taaneqarmata. Qinersinermut ataatsimiititaliap makitsinerata kingorna qineqqusaartunut sinniisussat allattorsimaffiat imatut isikkoqalerpoq:

Klara Jakobsen

Paninguak Rosbach Herlufsen

Gerda Vilholm

Torben S. Lynge

Tamatuma saniatigut Partii Naleraq sinnerlugu sinniisussat allattorsimaffianni qineqqusaartut akornanni makitsisoqarpoq, qineqqusaartut 2 tamarmik immikkut 27-nit taaneqarmata sinniisussallu 2 tamarmik immikkut 42-nit taaneqarlutik. Qinersinermut ataatsimiititaliap makitsinerata kingorna qineqqusaartunut sinniisussat allattorsimaffiat imatut isikkoqalerpoq:

Leif Fontaine

Arnaq Brønlund

Malene Ingemann

Per Rosing

Qinersinermut ataatsimiititaliap makitsineri tusagassiortut aggersarneqarsimasut alaatsinaappaat.

 

Makitsinermit immiussaq tusarnaaruk.

 

Makitsinermit assilisat.

 

Nuuk ulloq decembarip 8.-t 2014

Svend Hardenberg

Qinersinermut Ataatsimiititaliami siulittaasoq

Attaveqarfissat: Qinersinermut Ataatsimiititaliaq oqar. 34 50 00