2015-mut aalisagartassat pillugit isumaqatigiinninniarneq

Kalaallit Nunaata Savalimmiullu akornanni 2015-mut aalisakkanik pisassiissutissat pillugit isumaqatigiinninniarneq

Aalisarnermut, Piniarnermut Nunalerinermullu Naalakkersuisoqarfik atorfilittatigoortumik Savalimmiormiunut ulluni 4. aamma 5. december 2014, 2015-mut aalisarsinnaatitaanissaq pillugu isumaqatiginninniarput. Isumaqatiginninniarneq Københavnimi pivoq.

2015-mut isumaqatigiissutit

Illuatungeriit Kalaallit Nunaanneersut Savalimmiormiut imartaanni aalisarsinnaanerat kiisalu Savalimmiormiut Kalaallit Nunaata imartaanni aalisarsinnaanerat isumaqatigiissutigivaat.

2015-mut isumaqatigiissutip kinguneraa Kalaallit Nunaata ammassassuartassaasa 2.100 tonsiusut attatiinnarneqarnissaat. Taakku saniatigut Kalaallit Nunaata Savalimmiut imartaanni saarullernarniarsinnaanera  annertusineqarpoq, 2014-imi 5.000 tonsiusimasoq 2015-imi 5.500 tonsinut qaffanneqarluni. Kalaallit Nunaata ullut 60-it savalimmiormiut killeqarfianni aalisakkanik naqqasiortunik aalisarsinnaatitaanera peerneqarpoq, periarfissaq taanna ukiuni kingullerni atorneqartarsimanngimmat pisassat appariartornerat pissutigalugu. Taamatuttaaq Savalimmiut raajartassaat 100 tonsiusut peerneqarput pisassat appariartornerat periarfissallu atorneqarsimannginnera pissutigalugu.

Isumaqatigiissut malillugu Savalimmiormiut Kalaallit Nunaata imartaanni  aalisagartassaat ukioq 2014-imut sanilliullugit allannguuteqassanngillat.

Aammattaaq ukioq manna aalisarnermik inuussutissarsiortut isumaqatiginnin­ni­ar­nermi peqataatinneqarput. Kalaallit umiarsuaatillit aamma inuus­sutissarsiornermik ingerlatsisut isumaqatigiinniarnerni peqataasut, Aalisarnermut Piniarnermut Nunale­ri­nermullu Naalakkersuisoqarfik peqatigalugu nalilerpaat aappaagumut aa­li­sagartassat pillugit isumaqatiginninniarnermi angusarineqartut naamma­gi­nartuusut.

NAFO 3L

NAFO (Northwest Atlantic Fisheries Organization) 3L-imi Grand Banks-ip eqqaaniittumi raajarniarneq NAFO-p ukiumoortumik ataatsimeersuarnerani septemberimi pisumi matuneqarpoq tamatumalu kingunerisaanik illuatungeriit raajartassanik agguaassinissaq pillugu isumaqatigiissuteqanngillat.  

Paasissutissanik allanik perusukkaanni attavigineqarsinnaavoq Immikkoortortaqarfimmi Pisortaq Emanuel Rosing, emanuel@nanoq.gl.