Nunap Karsiani tigoriaannaateqarneq ajunngilaq

Nunap Karsiani aningaasanik tigoriaannaateqarneq suli ajunngilaq.

Sapaatit akunneranni kingullermi september 2014-imi missingersuutinut malitseqartitsineq suliarineqarpoq saqqummiunneqarlunilu. Tassani takuneqarsinnaavoq ukiumi 248,8 mio. koruuninik IST-mi amigartooruteqarallartoqartoq.

Tamakkununnga atatillugu apeqquterpaalunnik saqqummertoqarpoq, ilaatigut Nunap Karsiata tigoriaannaateqarneranut Danmarkimiillu ataatsimoortumik tapiissutaasartunut tunngatillugu. Kinguliini tamakku nassuiarneqarput, takuneqarsinnaalluni

Nunap Karsiani aningaasanik tigoriaannaateqarneq suli ajunngitsoq

Naalakkersuisut Danmarkimiit ataatsimoortumik tapiissutinik siumoortumik atuisimanngitsut.

Namminersorlutik Oqartussani aningaasanik tigoriaannaatigineqartut tamakkerlutik karsimiittuutit, aningaaserivimmiittuutit pappialallu aningaasanik nalillit piffissap sivikitsup ingerlanerani tunineqarsinnaasut inernerattut naatsorsorneqartarput.

2014 tamakkerlugu aningaasanngorlugit tigoriaannaatit tamarmiusut 625 aamma 1.075 mio. koruunit akornanniissimapput, ukiunut siusinnerusunut tunngatillugu annertuumik allaanerussutit Danmarkimiit ataatsimoortumik tapiissutit nuunneqarnerannut ullup suuneranik nassuiarneqarsinnaakkajuttarlutik. Ukioq manna pissutsit ukiumut siulianut assingupput, aningaasat tigoriaannaatit 800 aamma 1.140 mio. koruunit missaanniittarlutik.

2013-imisulli aningaasat tigoriaannaat ukiaq manna 900 mio. koruunit missaanniipput, taakkulu ukiumi matumani qaammatini kingullerni marlunni taamatut qaffasissuseqassasut naatsorsuutigineqarluni. Taamaammat 2014-ip affaani kingullermi aningaasanngorlugit tigoriaannaatigineqartut ukiumi siulianisut illuinnassapput.

Danmarkimiit ataatsimoortumik tapiissutit siumoortumik akiliutigineqartarnerat:

Apeqqutigineqakkajuttarpoq siumoortumik akiliuteqarnerit nunap karsiata angusanut naatsorsuutaani qanoq nalunaarsorneqartarnersut.

Danmarkimiit ataatsimoortumik tapiissutit akiliutigineqartut aningaasaqarnitsinni aningaasanik tigoriaannartut nalunaarsorneqartarput ´ataatsimoortumik tapiissutit siumoortumik akiliutigineqarnerat´-nik taallugu illuatungiliilluni. Illuatungiliineq taanna killiffimmik inissiineruvoq, tassa akiliuteqarneq piffissamut aggersumut/ ukiumut naatsorsuuteqarfiusumut nutaamut tunngasuusimappat. Taamaalilluni ataatsimoortumik tapiissutit siumut akiliutigineqartut IST-mi angusanut sunniuteqartanngillat.

Taamaapportaaq uagut Namminersorlutik Oqartussani akiligassat 2014-imut tunngasut januar 2015-imi akileraangatsigit. Taamatut pisoqartillugu Namminersorlutik Oqartussat aningaasartuutit ukiumi naatsorsuuteqarfiusumi 2014-imi nalunaarsussavaat  ukiumilu 2014-imi ukiup naanerani naatsorsuutini akiligassatut allallugit oqimaaqatigiissitsinermi naatsorsuutiniittutut.

 

Hans Jørgen Mørch

Qitiusumik Naatsorsuuseriffik

Kinguliiniippoq takussutissiaq ukiuni kingullerni pingasuni aningaasat tigoriaannaat allanngorarnerannut takussutissaq.

Takuneqarsinnaasutut aningaasat tigoriaannaat ukiuni taakkunani tamani ullumikkumut aalaakkaasimapput, ukioq manna majimi julimilu ataasiakkaanik allannguallattarsimallutik. Allannguallannernut taakkununnga pissutaapput Danmarkimiit ataatsimoortumik tapiissutit kingusinaartumik nuunneqartarsimaneri.

Takutitassiaq uani takujuk.