Namminersorlutik Oqartussanut missingersuutinik malittarinneqqinneq

2014-imi septembarip naanerani missingersuutinik malittarinninnermi ukiumut 2014-imut tamarmiusumut IST-p katillugit 200 mio. kr.-inik amigartooruteqarfiunissaa erserpoq IST-p 51,4 mio. kr.-inik amigartooruteqarfiunissaa 2014-imut aningaasanut inatsimmi missingersuutaagaluartoq, tassani ilaallutik 2014-imi ilassutitut aningaasaliissutit.

Angusassatut naatsorsuutigisat minnerunngitsumik nunatsinni suliffissaaleqinerup annikillisarneqarnissaanik kissaateqarneq aallaavigalugu iluarsagassanik sanaartugassanillu siuartitsinermut atatillugu 174 mio. kr.-inik ilassutitut aningaasaliissuteqarnermit sunnerneqarpoq.

Tamatuma saniatigut isertitassatut naatsorsuutigisat naatsorsuutigisamit ikinnerungaatsiarneri missingersuutinik malittarinninnermi paasinarsivoq. Tamanna arlalinnik pissuteqarpoq.

Akileraarutinit akitsuutiniillu isertitat missingersuutigisanit 100 mio. kr.-it missaannik ikinnerussangatinneqarput. Akileraarutit akitsuutillu 1 %-imik nikinganerat 20 mio. kr.-it miss. Nikingassuteqarnermut naapertuupput. Inuiaqatigiinni aningaasaqarnerliuleriartorneq pissutaanerpaavoq, suliffissaaleqisoqarnerulernerata saniatigut akileraarutitigut isertitakinnerunermik nassataqartoq, innuttaasut atugassaminnut aningaasaatikinnerulerput tamatumalu nassatareqqillugu ass. Eqqussuinermut akitsuutinit naqissusiinermullu akitsuutinit isertitakinnerulerneq. Imigassamit tupamiillu  isertitat ikilipput, missingersuutigisanit isertitakinnerussutaallutik, tamatuma saniatigut avaleraasartuunut akitsuutit missingersuutigisanit 20 mio. kr.-inik ikinnerusunik isertitsissutaapput.

Illuutinik Illuut A/S aqqutigalugu attartortitanik nutaajunerusunik tunisinermit iluanaarutissatut naatsorsuutigisat naatsorsuutigisanit ikinnerujussuupput, taamatullu aamma RAL-imit pissarsianit akiliutissatut missingersuutit piviusunngortinneqaratik. EU-mit suleqatigiinnissamik isumaqatigiissummit isertitat taamatuttaaq naatsorsuutigisamit ikinnerussapput.

Suliassaqarfinni arlalinni isertitassatut missingersuutigisat ikinneruneri 2015-imut aningaasanut inatsisissatut siunnersuutissamut tunngaviusumik missingersuutini iluarsiissuteqarnissamut pissutissaasinnaasutut naatsorsuutigineqartariaqarput.

Ingerlatsinermut aningaasaliissutini ukiumut angusassatut missingersuutigisat 66,7 %-ii atorneqarsimapput. Tamatuma septembarip qaammataata naanerani ukiup missingersuusiorfiusup ¾-iata ingerlareerneranut tunngatillugu atuinnginnerunissamik naatsorsuuteqartoqarnera kinguneraa.

Peqqinnissaqarfiup ukiumi aningaasanut inatsiseqarfiusumi 2014-imi atuinerussuteqarnissamik naatsorsuuteqannginnera ingerlatsinermut aningaasaliissutinut tunngatillugu eqqaassallugu pingaaruteqarpoq tamatumanilu ukiorpassuarni aatsaat taama pisoqassalluni

Missingersuutinik malittarinninneq pillugu paasissutissat sukumiinerusut uunga takusakkit.

 

 

 

Attaveqarfissaq:
Naalakkersuisup allattaa Aviâja Olsen oqarasuaat 34 52 12.