Nuuk TV-mut naqqiut

Aleqa Hammondip bilagii pillugit atorfilittat suliaqarsimanerannik Nuuk TV-mi pingasunngornermi novembarip aqqaneq aappaanni 2014-imi ilanngutassiani marlunni kukkusunik paasissutissartaqarput.

Ilanngutassiami siullermi Nuuk TV-p Naalakkersuisoqarfimmi pisortaq Svend Hardenberg aamma pisortaq Mininnguaq Kleist allanit takuneqarsinnaanngitsumik konto-gallartumik pilersitsisimanerarpai. Ilanngutassiap aappaani Nuuk TV-p ilanngutassiami oqarpoq Svend Hardenbergip akiitsut konto-gallartumut inississimagai ersitsikkunnaarlugit.

Siullermik erseqqissaassutigineqassaaq Namminersorlutik Oqartussani kinaluunniit isertortumik kontoliorsinnaanngimmat. Qitiusumik Naatsorsuuseriffik aalajangersimasunik konto-qarpoq kimilluunniit allanngortinneqarsinnaanngitsunik, Qitiusumik Naatsorsuuseriffimmiillu akuersisoqartinnagu kontomik pilersitsisoqarsinnaanngilaq.

Ilanngutassiani konto-gallartutut taaneqartoq ileqqorineqartut naapertorlugit konto-voq, interimskonto-nik taaneqartartoq, Qitiusumik Naatsorsuuseriffiup aalajangersimasumik kontonut pilersaarutaaniittoq. Namminersorlutik Oqartussani immikkoortortat tamarmik taamaattumik konto-qarput akiligassat akiliisussanut eqqortunut inissinnissaasa tungaannut akiliussigallarnernut atorneqartartut.

Namminersorlutik Oqartussat Naatsorsuutinut ilitsersuutaani allassimavoq, naatsorsuutit imaaliallaannaq inissinneqarsinnaanngitsut kontomut (interimskontomut) tassunga utaqqiisaasumik inissinneqartartut. Taakku tassaasinnaapput akiligassat tigusat immikkoortortamit allanit akilerneqartussat imaluunniit amigartunik paasissutissallit. Akiligassat bilagitaqanngitsut/uppernarsaatitaqanngitsut aamma tassunga inissinneqarallarsinnaasarput.

 

Paasisaqarnerorusuttut attavigisinnaavaat Naalakkersuisoqarfimmi pisortaq Svend Hardenberg oqarasuaammut +299 34 51 03 imaluunniit e-mail shva@nanoq.gl.