Aappaagumut qaleralittassiissutit ilaannik aalisarsinnaavutit

Fiskefartoej

Aqutsiveqarfinni Qeqertarsuup Tunuani, Uummannami Upernavimmilu aalisariutit meterinik arfinilinnik anginerit ukioq maannamut qaleralittassiissutitik tamaasa aalisarsimagunikkit, akuerineqarlutik novembarip 15-iata kingorna qaleralinniaqqilersinnaapput.

Aalisarsinnaanermut akuersissutit pisassiissutillu pillugit Namminersorlutik Oqartussat nalunaarutaanni nr. 9, 17. juli 2014-meersumi § 7 naapertorlugu novembarip 15-iannit decembarip 31-annut qaleralittarineqartut aappagu pisassaniit ilanngaatigineqassapput.

Aamma aalisariutip meterinik arfinilinnik anginerup ukiumut qaleralittassani tamakkersimanngikkunigit, pisarisimanngisani aappaagumut pisassanngortissinnaavai – nuussinnaavai. Ukioq manna pisarinngisaata amerlaqataannik nuussisoqarsinnaalluni.

Qalerallilli aappaagumut pisassanngortinneqartut – nuunneqartut juulip aallaqqaataa nallertinnagu aalisareerneqarsimassapput. Nuunneqartut taamaallaat aalisarneqarsinnaassapput aqutsiveqarfinni ukioq manna pisassiissutit tamakkerlugit aalisarfiusimanngitsuni.

Novembarip 15-iata kingorna qaleralinniarsinnaanermut nuussinissamillu Aalisarnermut, Piniarnermut Nunalerinermullu Naalakkersuisoqarfimmut, aalisalernissaq kingusinnerpaamik sapaatip akunneri marluk sioqqullugu qinnuteqartoqarsinnaavoq.

Qinnuteqaammi allassimasoqassaaq sumi qaleralinniarnissaq kissaatigineqartoq, aamma allassimassalluni qanoq amerlatigisunik ukioq manna qaleralittarineqartussatut kissaatigineqarnersut, aappaagumulluunniit nuunneqartussat pillugit aamma allassimasoqassalluni.

Attavigineqarsinnaasoq: Aalisarnermut, Piniarnermut Nunalerinermullu Naalakkersuisoqarfik, immikkoortortaqarfimmi pisortaq Emanuel Rosing. E-mail: Emanuel@nanoq.gl