Uumasut nakorsaat: Kangerlussuarmi terianniat qanillinagit

Kangerlussuarmi politiit nalunaarput terianniat qaasoqisut inunnullu qunusueqisut nunaqarfimmut suli qaninngoortartut, innuttaasunut, biilinut biilertunullu allaat qaninngoortaqalutik.

Kangerlussuarmi politiit innuttaasunit ilisimatinneqaraangamik terianniaqarfiusunut takusaasarput.

- Terianniaqarfiusunut takusaajartortuassapput, teriannianillu toqutsisassallutik, uumasut nakorsaat Sanne Eline Wennerberg oqarpoq.

- Kangerlussuarmi innuttaasut kajumissaarusuppakka terianniamik naammattuuisimagunik, tamanna politiinut nalunaarutigisaqqullugu, Sanne Eline Wennerberg oqarpoq, mianersoqqussutigalugulu innuttaasut teriannianut qanilleqqunagit.

-Terianniat qanittuaqqamiittut assilissallugit soqutiginartartorujussuugaluartoq, taamaattoq qanillineqartassanngillat. Inuk terianniamik perlerortumit kiineqartoq perlerornermik nappaateqalersinnaavoq. Nappaat navianartorujussuuvoq toqqutsigineqarsinnaalluni, Sanne Eline Wennerberg erseqqissaavoq.

Perlerorput

Kangerlussuarmi politiit oktobarip 12-anni ilisimatitsipput teriannianik marlunnik eqqumiitsunik pissusilersortunik toqutsisimallutik, taakkulu niaqui perlerorneri qularnaarniarlugit nassiunneqartut.

Uumasut nakorsaat ilisimatinneqarsimavoq terianniat perlerortuusut.

Qeqqata Kommuniata qimmilerisuata qimmiutilinnut attaveqartuusup qimmiaqqat marlunnit qaammatillit sapaatip akunnerata tullianit akiuussutissamik kapisartussaavai.

Attavigineqarsinnaasoq: Uumasut Nakorsaqarfiat Inuussutissalerinermullu Oqartussaaffik. E-mail: uumasut@nanoq.gl